Jalpy, Jetisý aýdanynda 2024 jyldyń sońyna deıin úsh emhana ashý josparlanǵan bolsa, osy emdeý mekemeleri keleshekte aýdandy tolyq medısınalyq qyzmetpen qamtamasyz etpek. Sonymen qatar «Saıahat» avtovokzaly men «Qulager» shaǵyn aýdanyndaǵy emhanalar jańǵyrtylyp, paıdalanýǵa berilgeli otyr. Jumysshylar kentindegi №33 emhana da saqadaı saı daıyn.
Jetisý aýdanynda birneshe jyl buryn úsh qana emhana bolǵandyqtan, jergilikti halyq kóbinese kórshiles Túrksib, Almaly, Medeý aýdandaryna qaralýǵa májbúr edi. Bul bir jaǵynan Jetisý aýdanynda emhana salýǵa jer teliminiń tapshylyǵynan týǵan másele bolatyn. Osy túıtkildi tarqatý úshin medısınalyq mekemege jaramdy ǵımarat qarastyrylyp, aýdan ákimi Gúlnár Kókebaeva máseleniń zańdy jaǵyn qolǵa alyp, birte-birte emhanaǵa aınaldyrýǵa jaramdy úsh ǵımarat satyp alyndy.
Buǵan qosa Kemel shaǵyn aýdanynda aýysymda 200 adam qabyldaıtyn otbasylyq-dárigerlik ambýlatorııa salyndy. Bul qazir atalǵan shaǵyn aýdan turǵyndaryna qyzmet kórsetedi. Sondaı-aq №11 emhanada kúrdeli jóndeý júrgizildi, KT men MRT qyzmeti bar óziniń dıagnostıkalyq ortalyǵyn ashty.
Osy aýdandaǵy ózge de oń ózgeristerge toqtalatyn bolsaq, uzaqmerzimdi jobalar sátimen iske asyrylyp, jurt aýqymdy ınfraqurylymdyq jobalardyń ıgiligin kóre bastady. 2019 jyldan beri 190 myńnan asa halqy bar aýdanda 96,7 shaqyrym sýmen jabdyqtaý jáne sý burý jelilerin qaıta jańartý sııaqty basym jobalardy atqarý isi kesheýildep turǵan edi. 2020 jyldan bastap aýdandy basqarýǵa kelgen Gúlnár Kókebaeva osy jumysty ilgeriletip, tapsyrysty «Elektroremont» JShS merdigerlik uıymdary oryndady. Bıyl qazylǵan kóshelerdi tolyq asfalttap, ekinshi merdiger oıdym-oıyq joldarǵa ortasha jóndeý jumystaryn júrgizýge tıis.
Sol sııaqty bıyl Almaty oblysynan qalaǵa qosylǵan shaǵyn aýdany turǵyndarynyń bir bóligi turaqty qalalyq sýmen qamtamasyz etiledi. Kemeldiń turǵyndary da jyldar boıy sý tapshylyǵyn ábden tartyp kelgen edi. Oǵan qosa Kemelge 43,5 shaqyrym elektr symy tartylyp, qalanyń jańa shaǵyn aýdany turaqty qalalyq elektr qýatyna qosyldy. Sondaı-aq 32,5 shaqyrymdyq Palladın – Pavlodar – Boraldaı, Taımyr kósheleriniń aýmaǵynda jańa elektr jelileri tartyldy. Uzyndyǵy 8,4 shaqyrym bolatyn magıstraldyq jylý jelileri qaıta jańartyldy. Kóshelerdi jaryqtandyrý máselesi de sheshimin taýyp, bıyl jańa baǵanalar ornatylyp, 150 jartylaı jaryq júrgizilmegen kóshede 35 myń shaqyrymnan asa kabel salyndy.
Osynaý ońdy jańalyqtar – bir ǵana Jetisý aýdanyna tıesili.
ALMATY
