Qaraǵandyda «Aıbyn» respýblıkalyq áskerı-patrıottyq jıyn ótýde

QARAǴANDY. 12 maýsym. Qala irgesindegi Spassk oqý-jattyǵý bazasynda «Aıbyn» respýblıkalyq áskerı-patrıottyq jıyn ótýde. Sharaǵa elimizdiń barlyq óńirinen 800-ge jýyq jas qatysýda. Bul týraly egemen.kz tilshisi habarlaıdy. Uıymdastyrylyp otyrǵan sharaǵa Qorǵanys mınıstriniń birinshi orynbasary, Qarýly kúshteri Bas shtabynyń basshysy general-polkovnık Sáken Jasuzaqov qatysyp, qatysýshylardy quttyqtady. Ol: «Bul shara jastardy otansúıgishtikke tárbıelep, patrıottyq sezimin qalyptastyrýǵa arnalǵan. Sizder oqý-jattyǵý kezinde temirdeı tártipti úırenip, áskerı daıarlyqtaryńyzdy jetildire túsesizder. Barlyqtaryńyzǵa sáttilik tileımin», – dedi. Áskerı-patrıottyq jıynda qatysýshylar sporttyq saıystardan baq synaıdy. Atap aıtsaq, jas sarbazdar men stýdentter beltemirge tartylý, myltyq atý, gaz tumshasyn jedel kııý, medısınalyq járdem kórsetý, qashyqtyqqa júgirý sekildi synaqtar tapsyrady. Aıta keteıik, saıys qortyndysy erteń anyqtalyp, úzdikter marapattalatyn bolady. Aıqyn Nesipbaı. Derek: egemen.kz. Sýret: vk.com.