Bas bapkerge zor senim júkteldi

Tórtkúl dúnıe nazaryn aýdaratyn etno­sport alamanyn­da qazaq pen qyrǵyzdyń kók­par tartysyn asyǵa kútý­shiler kóp. Sebebi únemi ıtjyǵys túsip, bir-biriniń taqymyndaǵy serkeni alma kezek óńgerip ketip júr. Álem chempıonaty, halyqaralyq týrnırlerde, Dúnıejúzilik kóshpeliler oıyndarynda bas júlde úshin tartys eki eldiń kókparshylary arasynda órbıtini zańdy da.

Kókpardan elimizdiń ult­tyq quramasynda bas bap­keri aýysty. Buǵan deıin kók­parshylardy álemdik do­da­larǵa baptap qosqan bi­lik­ti bapker Qýanyshbek Qura­maevtyń ornyna Aqylbaı Mankeev tizgin ustady. Aqyl­baı kókparshynyń esim-soıy atalǵanda, kópshiliktiń esine býllıt serııasy oralatyny belgili. Ulttyq qurama sapynda, elishilik kókpar dodasyna qatysqanda Aqylbaı Mankeev kóbine býllıtte qarsylasynan basym túsetin. Tájirıbeli sportshyǵa ulttyq quramanyń bas bapkeri laýazymy zor senimmen tapsyryldy.

«V Dúnıejúzilik kóshpe­liler oıyndaryna kókpardan ulttyq qurama músheleriniń oqý-jattyǵý jıyny Almaty oblysyndaǵy Olımpıadalyq daıarlaý ortalyǵynda ótip ja­tyr.  Ortalyq basshylyǵy kók­par alańyn daıarlap, bar­lyq múm­kindikti týdyryp otyr. Ázirge fı­zıkalyq da­ıyndyqty, attardy kókpar tártibine beıimdep kelemiz. Jalpy, kókpardan ulttyq quramanyń ózine tıesili attary bolmaıdy. Ár óńirdegi atbegilerden jalǵa alyp, júı­rikterimizdi túgendedik. Balýandar birneshe aımaqtan jetkizilgen 40 atty dodaǵa úıretip jatyr. Jattyǵý jıynyna 29 shabandoz keldi. 12 sportshy kókpardan, ıaǵnı sheńberge salym salý saıy­sy boıynsha alańǵa shyqsa, qalǵan 12 balýanymyz qyrǵyzdyń kókbóri dodasynan tartysqa túsedi. Kókparǵa qatysqan shabandoz kókbóri boıynsha tar­tysqa shyqpaıdy. Bir aıdan asa ýaqytymyz bar, jattyǵýdy áli de pysyqtaı túsemiz», deıdi kókpardan ulttyq quramanyń bas bapkeri Aqylbaı Mankeev.

Maman kókpardan Dúnıe­­júzilik kósh­peliler oıyn­darynda top jarýdy kóz­deıtinin jetkizdi. Al kókbóri saıysynda qyrǵyzdyń shabandozdary da, attary da tegeýrindi ekenin alǵa tartty.

«Tól sportymyz kókpar­dan óz jerimizde ótetin Dúnıe­júzilik kóshpeliler oıyndarynda chempıon atanýǵa ba­rymyzdy salamyz. Al kók­bóriden negizgi qarsylas qyrǵyz balýandary ońaıdan olja ustatpaıdy. Onyń ústine biz­diń quramanyń beldi attary sanalǵan «Namyskók», «Lazer» syndy ústindegi kókpar­shynyń oıyn aıtqyzbaı uǵatyn, esti júırigimiz joq. Aımaqtan jınap ákelgen attardy jek­pe-jek synyna, býllıt­ke, jalpy, kókpardyń ere­je­sine saı daıarlaýǵa az kúsh ketpedi. El chempıonatynda, basqa da týrnırlerde kók­­par­shylardyń mingen at­ta­rynyń áleýetin saralap irik­tedik. Negizinen Jambyl ob­lysynyń «Áýlıeata» kók­par komandasynyń attaryna nazarymyz aýdy. Kók­parshylar astyndaǵy atyn óziniń yńǵaıyna ıkemdep beıimdep jatyr. Qyrǵyzstan kókpar quramasyna shaqyrtý alǵan shabandozdardyń da tizimi belgili. Dúnıejúzilik kóshpeliler oıyndaryna kór­shimizden kimderdiń ke­letini anyq bolǵan soń, biz de bas­ty básekeles quramanyń mú­shelerine qarsy ázirlikti kú­sheıttik», dedi A.Mankeev.

Oqý-jattyǵý jıynyna shaqyrtý alǵan sport­shy­lar­dyń basym kópshiligi Dú­nıejúzilik kóshpeliler oıyndaryna alǵash ret qosylmaq.