«Bizdiń mınıstrlik 2022 jyldan bastap jataqhana máselesin qolǵa aldy. Jyl saıyn on myńnan astam tósektik orynǵa arnalǵan jataqhana qurylysyn bastap jatyrmyz. Byltyr 10 343 tósektik orynǵa arnalǵan 43 nysan tapsyrylsa, bıyl jyl sońyna deıin 27 nysan ótkiziledi. 10 500 asa tósektik orynǵa negizgi tapshylyq – Astana men Almaty qalasynda. Biraq kelesi jyly elordada bul másele tolyq sheshiledi dep otyrmyz. Mine, Eýrazııa ulttyq ýnıversıtetiniń 2700 tósektik orynǵa arnalǵan jataqhanasy tapsyrylyp jatyr. Onyń 300 jáne 400 orynǵa arnalǵan jataqhana qurylysyn birden bastap kettik. Myń orynǵa arnalǵan jataqhana qurylysy kelesi jyly engiziledi. Sondyqtan bul másele – mınıstrliktiń udaıy baqylaýynda», dedi Saıasat Nurbek.
Sondaı-aq Ǵylym jáne joǵary bilim mınıstri byltyr sýbsıdııalyq normatıvter ózgertilgenin aıtty.
«Bizdiń qarjy ortalyǵy arqyly jekemenshik merdigerler jataqhanany salǵannan keıin alty jyldyń ishinde aqshany qaıtaryp beretin arnaıy mehanızm bar. Bıyl onyń ústine qaıta jabdyqtaýǵa sýbsıdııalyq normatıvterdi ózgertetin bolamyz, ıaǵnı burynnan salynǵan qonaqúı, hostel nemese bıznes ortalyqtaryn úkimettiń kómegimen olardy jataqhanaǵa aınaldyrýǵa múmkindik beremiz. Sondyqtan Astana, Almaty jáne elimizdegi ózge de iri qalalardyń kásipkerlerine úndeý tastaǵym keledi. Bul memleketke de, stýdentterge de, ózderine de paıdaly ári úlken kómek», dedi ol.
Jańa oqý jyly L.N.Gýmılev atyndaǵy Eýrazııa ulttyq ýnıversıteti stýdentteri úshin qýanyshpen bastalmaq. Atalǵan joǵary oqý orny olardy jataqhanamen tolyq qamtamasyz etýdi josparlap otyr. Jańadan salynyp jatqan 4 Ctýdentter úıiniń qurylysyna jeke ınvestısııa tartylǵan. Sonyń biri bıyl paıdalanýǵa beriledi. Ýnıversıtet eki jyl ishinde Stýdentter úıiniń sanyn kóbeıtip,
5 myńnan asa oryndy paıdalanýǵa bermek. Bıyl Maǵjan Jumabaev kóshesinde boı kóterip jatqan zamanaýı jataqhana stýdentterge esigin aıqara ashady.
«Qazirgi tańda memlekettik qoldaýdyń arqasynda ınvestorlar Stýdentter úıiniń qurylysyna aıryqsha qyzyǵýshylyq tanytyp otyr. Oqý jylynyń aldynda jańa Stýdentter úıi paıdalanýǵa beriledi. Búgin biz osy baǵytta taǵy da
úsh Stýdentter úıiniń qurylysyn salýǵa belsendi jumys istep jatyrmyz», dedi ýnıversıtet rektory Erlan Sydyqov.
Eýrazııa ulttyq ýnıversıtetiniń jańa Stýdentter úıin «AEK Munai» JShS salyp jatyr. Qazir 2 blok, 6 qabattan turatyn ǵımarat qurylysy qarqyn alǵan. Jataqhananyń jalpy aýdany 4,5 myń sharshy metrden asady.
«Bıyl bizdiń kompanııa óz qarajatyna stýdentter jataqhanasyn salýdy sheshti. Bizdiń alǵashqy jobamyz – Eýrazııa ulttyq ýnıversıtetiniń Stýdentter úıi. Alty qabatty ǵımaratta 170 bólme, 400 oryn qarastyrylǵan. Qurylys jumysy jyl basynda bastaldy. Endi 7 aıda aıaqtaǵaly otyrmyz. Jataqhana jaıly ári zamanaýı. Birinshi qabatta stýdentter úshin kovorkıng aımaq ornalasady. Bizdiń kompanııa buǵan deıin Astana qalasynda «Aısafı», «Arýjan», «Shyńǵys-1», «Shyńǵys-2» turǵyn úı keshenin saldy», dedi «Bastau Damu KZ» JShS dırektory Arman Halelov.
Aıta keteıik, byltyr Memleket basshysynyń tapsyrmasy aıasynda Astanada Stýdentter jataqhana qurylysynyń jobalyq keńsesi quryldy. Osy baǵytta Ǵylym jáne joǵary bilim mınıstrligi, Astana qalasy ákimdigi, «Qarjy ortalyǵy» AQ jáne ınvestorlar men joǵary oqý oryndary arasynda yntymaqtastyq týraly memorandým jasaldy.
Qurylys jumysyn júrgizip jatqandardyń ishinde «Integra» kompanııasy da bar. Olar úsh blok, bes qabattan turatyn 2 656 oryndyq Stýdentter úıin salyp jatyr.
«Qazir qurylys jumysy qarqyndy júrgizilip jatyr. Stýdentterge jyly ári jaıly bolý úshin bar kúshimizdi salamyz. Qurylysta 450 adam isteıdi. Biz salyp jatqan Stýdentter úıinde oqý zaly, kovorkıng aımaq, kompıýterlik synyp sekildi jastarǵa qajetti barlyq dúnıe qamtylady», deıdi «Integra» kompanııasynyń bas dırektory Danııar Rahymtaev.
