Byltyr Jambyl oblysy Baızaq aýdanynyń 342 turǵynyna «Aýyl amanaty» jobasy aıasynda 2,1 mlrd teńgege 2,5%-ben jeńildigi bar nesıe berildi. Bir jyl ishinde aýyldarda jańa óndiris oryndary ashyldy. Tamara Dúısenova aýyl turǵyndarymen kezdesip, tabysty jobalarmen tanysty.
Jalǵyztóbe aýylynyń turǵyny Ǵanıbek Jumasaev baǵdarlama boıynsha alynǵan 6 mln teńge mólsherinde jeńildigi bar nesıe qarajatyna kásibı jabdyqtar satyp alyp, temir shatyr jabyndaryn, metall plıtkalar, pishinde tósenishter ázirleýdi qolǵa alǵan. Kásipker óz ónimi úlken suranysqa ıe bolatynyna senimdi: kórshiles eki aýylda jeke turǵyn úı salýǵa 700-den astam ýchaske bólingen. Onda qurylys jumys bastaldy jáne aýyl turǵyndary jergilikti óndirýshiden shatyr jabynyna tapsyrys bere alady.
Vıse-premerge avtokólik jýý, monsha kesheni, sulýlyq salondary jáne basqa da nysandardyń sátti júzege asyp jatqany baıandaldy. Tamara Dúısenova iske asyrylyp jatqan jobalarǵa oń baǵasyn berip, jergilikti turǵyndardy aýyl halqynyń ómir súrý deńgeıin arttyrýǵa baǵyttalǵan memlekettik baǵdarlamalar týraly habardar etti. Búginde óz bıznesin ashqysy keletin jastardyń jeńildigi bar nesıe alýǵa múmkindigi mol, al áleýmettik osal sanattaǵy azamattar úshin óteýsiz granttar kózdelgeni atap ótildi.
Oblys ákimdiginde ótken otyrysta «Aýyl amanaty» baǵdarlamasyn nasıhattaý jáne halyqtyń bıznes-ıdeıalaryn qoldaý boıynsha júrgizilip jatqan jumys týraly Jambyl, Talas jáne Jýaly aýdandarynyń ákimderi baıandady. Aqtóbe oblysy Sarjansaı aýyldyq okrýginiń ákimi osy baǵyttaǵy tájirıbesin bólisti.
«Aýyl turǵyndarynyń ál-aýqatyn arttyrý – memleket damýynyń kepili. «Aýyl amanaty» jobasy ár óńirdiń ereksheligin eskere otyryp, ár oblysta iske asyrylýda. Tabysty jetistikterin bólisý jáne baǵdarlamany júzege asyrýdyń tıimdi jaǵdaıyn keńinen taratý mańyzdy. Aýyl ákimderi halyqqa túsindirý jumystaryn belsendi júrgizýi tıis», — dep atap ótti Tamara Dúısenova.
