Foto: Ulttyq sport qaýymdastyǵynyń baspasóz qyzmeti
Jarys báıgeniń 4 túri boıynsha ótti: Qunan báıge, Top báıge, Jorǵa jarys jáne Alaman báıge, jalpy júlde qory — 24 900 000 teńge.
«Bul báseke - báıgeden el chempıonatynyń 8-kezeńi, al bir jaǵynan osy kúzde Astanada ótetin 5-shi Dúnıejúzilik kóshpeliler oıyndaryna irikteý esebinde ótip jatyr. At jarysqa elimizdiń túkpir túkpirinen eń úzdik jylqylar jınaldy. Olar báıgeniń tórt túrinen, ıaǵnı qunan báıge, top báıge, alaman báıge jáne jorǵa jarys atalymy boıynsha synǵa túsedi. Ár báıge túrine shamamen 25 tulpar qatysyp jatyr. Bul attardyń jaǵdaıy jaqsy, aldaǵy úlken dodaǵa daıyn dep aıta alamyn», dedi «Báıge» federasııasynyń atqarýshy dırektory Altaı Bımen.
Qunan báıgeden birinshi oryn alǵan Qamysqulaq atty tulpardyń shabandozy Aslanbek Abdyqal jeńis jolynda bapker keńesiniń kómegi tıgenin atap ótti.
«Bapkerdiń aıtýymen júrip otyrdym. Ol maǵan jarys bastala sala aldyńǵy topta otyrýǵa keńes berdi. Sońǵy aınalymda birinshi bolyp alǵa ozdym. Márege bes júz metr qalǵanda artymnan taǵy bir at kele jatty. Jetip ala ma dep qorqyp edim, biraq men birinshi keldim. Endi kóshpeliler oıyndaryna daıyndalamyn», dep atap ótti jas shabandoz Aslanbek Abdyqal.
II oryndy Naıza atty qunan aldy, shabandozy Arnat Murathan. Júldegerler úshtigin Aıshýaq esimdi atqa mingen Ańsar Arystanbek támamdady.
Top báıgede Ǵasyr atty sáıgúlik, Alıhan Jánibekuly esimdi shabandozymen úzdik atandy. II oryndy Ravshan, shabandozy Dilnur Nurmuqash ıelendi. III oryndy shabandoz Qaırjan Álıhan Táýekel atty tulparymen jeńip aldy.
Jorǵa jarys qorytyndysy:
- I oryndy ıelengen Orda, shabandozy Iýrıı Lymar;
- II oryn Vypýsk, shabandozy Anýarbek Abdrahmanov;
- III oryn Aqjaýyn, shabandozy Erbulan Tileǵalıuly.
Alaman báıge nátıjesi:
- I oryndy Soflor Lend esimdi aıǵyr, shabandozy Amır Amanuly;
- II oryndy Bereke esimdi jylqy, shabandozy Irınat Sanjar;
- III orynda Shaıkúreń atty tulpar shabandozy Arnat Murathan.
Is-sharanyń seriktesteri – Ultyq sport qaýymdastyǵy, Respýblıkalyq «Báıge» federasııasy jáne Pavlodar oblystyq ákimdigi.
Eske sala keteıik, 8-13 qyrkúıekte Astana qalasynda 5-shi Dúnıejúzilik kóshpeliler oıyndary ótedi. Is-sharaǵa 89 elden 2000-nan astam sportshy qatysady dep josparlanǵan. 5-shi Dúnıejúzilik kóshpeliler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpeliler oıyndarynda barlyǵy 21 sport túrinen 97 medal jıyntyǵy sarapqa salynady.
