Jylnama qaıta jańǵyrdy
Sporttyq gımnastıka 1896 jyly Afınada alǵash ret uıymdastyrylǵan Olımpııa oıyndarynyń baǵdarlamasyna engen. Erler men áıelderdi qosa eseptegende, bul jerde 14 júlde jıyntyǵy sarapqa salynady. HH ǵasyrdyń ekinshi jartysynda shymkenttik Iýrıı Sapenko men Nellı Kımniń halyqaralyq jarystarda atoı salǵanyn kóziqaraqty kórermender umyta qoıǵan joq. Sapenko 1994 jyly Tokıo Olımpıadasynda 1 kúmis pen 1 qolany qorjynǵa saldy. Kımniń kórsetkishi tipten keremet boldy. Nellı 1976 jyly Monreal, 1980 jyly Máskeýdegi dodalarda 5 altyn men 1 kúmis medaldy oljalady. 1988 jyly Seýlde qos jerlesimiz atoı saldy. Aqtóbelik Valerıı Lıýkın 2 altyn men 2 kúmisti ıelense, almatylyq Vladımır Novıkov komandalyq saıysta jeńis tuǵyrynyń eń bıik satysyna kóterildi. Biraq jerlesterimizdiń bul tabysynyń barlyǵy da kelmeske ketken KSRO-nyń enshisine jazyldy.
Táýelsizdik alǵannan keıin de Qazaqstannan jaqsy gımnasshylar shyqty. Buryn bir týdyń astynda bolǵan Reseı, Belarýs, Ýkraına, О́zbekstan, Latvııa quramalary álem chempıonattarynda medaldy «kúrep» alyp jatqanda, bizdiń jigitter arasynan tek Sergeı Fedorchenkonyń ǵana baǵy jandy. 1997 jyly Lozannada qoldy tirep jasalatyn jattyǵýda ol bas júldeni oljalady. Jalǵyz qomaqty tabysymyz – osy. О́zge jerlesterimiz táýir óner kórsetkenimen, oljaǵa kenele almady. Al Olımpıadadan qorjynymyz únemi bos qaıtyp júrdi.
Fransııanyń bas shaharynda sol olqylyqtyń orny toldy. Fınaldyq saıysta 15,433 upaı jıǵan 26 jastaǵy Narıman Qurbanov kúmis medaldy enshiledi. Ol tek álem men Eýropanyń eki dúrkin chempıony Rıs Makklenagandy alǵa jiberdi. Jerlesimiz Irlandııanyń dúldúlinen nebári 0,100 upaı qalyp qoıdy. Álem chempıony, Panamerıka oıyndarynyń jeńimpazy, amerıkalyq Stıven Nedoroshık (15,300 upaı) qola medaldy qanaǵat tutty. Al Olımpıadanyń 3 dúrkin chempıony, sol jarystyń 3 dúrkin qola júldegeri, 3 dúrkin álem chempıony jáne sol jarystyń 5 dúrkin kúmis júldegeri, ulybrıtanııalyq Maks Ýıtlok tórtinshi orynnan asa almasa, Rıo Olımpıadasynda – 2 (1 altyn, 1 kúmis), álem chempıonatynda – 5 (1+2+1), Eýropa oıyndarynda – 6 (3+3+0) jáne qurlyq birinshiliginde 14 (7+3+4) ret jeńis tuǵyryna kóterilgen Ýkraınanyń maqtanyshy Oleg Vernıaev besinshi satyǵa taban tiredi. Mine, osy málimetterdiń ózinen-aq ákesi Hýsanjan Sháripulynyń shákirti Narıman Qurbanovqa ǵalamdyq dodada jeńis tuǵyryna kóterilý úshin qandaı synaqtan ótýge týra kelgenin shamalaı berýge bolady.
Jeńis tuǵyrynan túsken bette Narıman: «Olımpıadalyq sıkl barysynda ótken básekeler barysynda men baǵdarlama sońynda jıi qulaıtynmyn. Bul meniń tehnıkalyq nemese taktıkalyq kemshiligim emes edi. Kóbine-kóp psıhologııalyq turǵydan utylatynmyn. Sol olqylyqtyń ornyn toltyrý úshin esh aıanbaı jattyqtym. Kóp eńbektendim. Olımpııa oıyndarynda ózimniń mol tájirıbeme arqa súıeı otyryp, bar bilgenimdi tolyǵymen avtomatty túrde oryndap shyqtym. Eren eńbek esh ketken joq. Parıjde kúmis medaldy ıelendim. Qazir qýanyshymda shek joq», dep aǵynan jaryldy.
