AQTAÝ. 12 maýsym. Mańǵystaýda kásipker oblystyq ákimshilikte ózine qol jumsaımyn dep qorqytty. Bul týraly egemen.kz tilshisi habarlady.
Aqtaý qalasyndaǵy teńiz jaǵalaýynda byltyr súrilgen «Ravıl» kafesiniń ıesi Bahtııar Masımov jurtshylyqty osylaı qorqytty. Kafesi súrilip, jer telimi memleket menshigine qaıtarylǵan, ózine materıaldyq jáne moraldyq shyǵyn qaıtarylmaǵandyqtan ol bul áreketke basqa amaly qalmaǵandyqtan baratyndyǵyn aıtty. Naqtyraq aıtsaq, jergilikti turǵyndar arasynda «Korablık» degen atpen málim kafesin jergilikti ákimdik zańsyz dep tanyp, jer telimin bosatýdy talap etken. Sottasýdyń sońy kásipkerdiń emes, ákimdiktiń paıdasyna sheshilip, jer telimi memleket menshigine qaıtarylýy tıis bolyp shyǵady. 2014 jyly 4 aqpanda «Ravılge» qatysty shyqqan sot sheshimi, sol jyly mamyr aıynda oryndalyp, kafe orny tazartylady. Qazir ol jerge avtoturaq salynýda.
Aqtaý qalasy ákiminiń orynbasary N.Aqqulov bul týraly «Lada» gazetine bergen suhbtynda: «Bahtııar Masımov 1998 jyly atalǵan jerdi 10 jylǵa jalǵa alǵan. 2008 jyly qaıtarý kerek bolǵan, biraq ol 2012 jylǵa deıin 4 jyl boıy zańsyz paıdalanyp keldi. 2012 jyly Aqtaý qalalyq ákimdigi zańsyz paıdalanyp otyrǵan jer telimin qaıtarýdy surady. Masımov kináli sanap otyrǵan Mańǵystaý oblystyq ákimdigi, Aqtaý qalalyq ákimdiginen bastap, barlyq atqarýshy jáne quqyq qorǵaý oryndary zań júzinde jumystandy. Masımovti ózine qol jumsaýǵa jetkizetindeı eshkim qysastyq kórsetken joq. Ol materıaldyq jáne moraldyq shyǵyn óndirýdi suraıdy. Al ákimdik odan 4 jyl boıy zańsyz paıdalanyp kelgen jerdiń jaldaý aqysyn da, kafeni súrý kezinde qoldanylǵan tehnıka, adam kúshiniń esebin de surap otyrǵan joq», – dedi.
Baqtııar Masımov elimizdiń Ishki ister mınıstrliginiń ishki áskerinde qyzmet etip, maıor sheninde zeınetke shyqqan. Qazirgi tańda Mańǵystaý oblystyq ázerbaıjan etno-mádenı birlestigi májilisiniń tóraǵasy.
Gúlaıym Shyntemirqyzy.
Derek: egemen.kz.
Sýret: tumba.kz.
