10 myńnan astam shyǵysqazaqstandyq til oqytý kýrstarynan ótti

О́SKEMEN. 11 maýsym. Shyǵys óńirinde tilderdi qoldaný jáne damytý memlekettik baǵdarlamasy belsendi júzege asyrylýda. Jyl saıyn memlekettik tildi úırenýge yqylas tanytýshylar qatary artyp keledi. Bıyl oblys boıynsha jańadan qazaq tilin meńgergender 1335 adamdy qurasa, aǵylshyn tilin úırenýshiler 517 adamǵa jetti. Bul týraly egemen.kz habarlady. Shyǵys Qazaqstan oblystyq tilderdi damytý basqarmasynyń basshysy Aıdyn Shaımardanovtyń aıtýynsha, basqarma aldynda Memleket basshysynyń Qazaqstan halqyna Joldaýyndaǵy «2011-2020 jyldarǵa arnalǵan tilderdi qoldaný jáne damytý memlekettik baǵdarlamasyn» júzege asyrý jónindegi tapsyrmalaryn oryndaý mindeti tur. Bul baǵdarlama tolyǵymen úsh kezeń boıynsha oryndalmaq. Onyń alǵashqy 2011-2013 jyldar aralyǵyndaǵy kezeńi ótti. Qazirgi kezde baǵdarlamanyń 2014-2016 jyldarǵa arnalǵan ekinshi kezeńin júzege asyrý boıynsha maqsatty jumystar qolǵa alyndy. Bul kezeńde memlekettik qyzmetker, halyqqa qyzmet kórsetý ortalyǵy jáne memlekettik qyzmet kórsetý qyzmetkerlerine arnalǵan memlekettik tildi bilý talaptarynyń tómengi talaptaryn mindetteýdi engizý qarastyrylady. Sonymen birge atalǵan kezeńde memlekettik tildi oqytý ortalyqtaryn akkredıtasııalaýdy ótkizý jáne olardyń reıtıngtik baǵalaryn engizý jumystary bastalady. 2017-2020 jyldarǵa arnalǵan úshinshi kezeńde memlekettik tildi meńgerý dárejesin qadaǵalaý mehanızmderin engizý jumystaryn uıymdastyrý kózdelip otyr. Onyń qatarynda qoǵamdyq ómirdiń barlyq salasynda memlekettik tildi talap etý dárejesine jáne basqa tilderdi saqtaı otyryp memlekettik tildi meńgerý deńgeıi men qoldaný barysyndaǵy sapaǵa júıeli monıtorıng jasaý qarastyrylmaq. Atap óterligi, oblys boıynsha mektepter, balabaqshalar, mekemeler men kásiporyndar, quqyq qorǵaý organdary janyndaǵy lıngvıstıkalyq ortalyqtarda 28 myńnan asa adamdy memlekettik tilde oqytýǵa baǵyttalǵan úıirmeler men kýrstar quryldy. Al 864 myńnan astam adam qazaq tilin KAZCENTER. KZ kómegimen úırenýde. Dýman Anash. Derek, sýret: egemen.kz.