Shyrshyq qalasynda otandyq joǵary oqý orny fılıalynyń ashylýy eki eldiń ǵylym-bilim salasyndaǵy yntymaqtastyǵyn arttyrady. Bul týraly ǵylym doktory, Ǵylym jáne joǵary bilim eks-vıse-mınıstri Qýanysh Erǵalıev áleýmettik jelilerdegi paraqshasynda jazdy.
«Muhtar Áýezov atyndaǵy Ońtústik Qazaqstan zertteý ýnıversıtetiniń О́zbekstannyń Shyrshyq qalasyndaǵy fılıalynyń ashylǵanyna óte qýanyshtymyn. Bul eki eldiń ǵylym-bilim salasyndaǵy yntymaqtastyǵyn arttyrýǵa jaqsy áser etetini sózsiz. Bul strategııalyq ıdeıanyń júzege asýyna Ońtústik Qazaqstan zertteý ýnıversıtetiniń burynǵy rektory Darııa Perneshqyzy Qojamjarova zor úles qosty. О́zbekstanǵa issaparmen birneshe ret baryp, fılıal ashý máselesin kóterdi, kelissózder júrgizdi. Men de Ǵylym jáne joǵary bilim vıse-mınıstri bolǵan kezimde de 5-6 ret baryp, saıası deńgeıdegi kezdesýlerde fılıal ashý týraly, ǵımarat berý máselesi, naryqqa kadr daıarlaý, zańnamalyq máseleler boıynsha kelissózder júrgizdim», dedi ǵalym.
Assıstent professor Qýanysh Asylhanulynyń aıtýynsha, otandyq JOO fılıaly tehnıkalyq, IT-tehnologııalar baǵytyndaǵy mamandardy daıarlaýǵa basymdyq beredi.
«Shyrshyq – О́zbekstannyń ónerkásibi damyǵan, qazaqtar kóp shoǵyrlanǵan qalalarynyń biri. Bul óńirde hımııa ónerkásibi, mashına jasaý, metall óńdeý sııaqty salalar qarqyndy damyǵan. Auezov University fılıaly О́zbekstannyń eńbek naryǵynda suranysqa ıe, básekege qabiletti mamandardy daıarlaýdy júzege asyratyn bolady. Tehnıkalyq, IT-tehnologııalar, hımııa jáne tamaq ónerkásibi baǵyttary boıynsha kadr daıarlaýdy júzege asyrady. Sondaı-aq joǵary bilim salasyndaǵy bul yntymaqtastyq Shymkent qalasynyń jáne ońtústik aımaqtyń ekonomıkasynyń strategııalyq damýyna úles qosatynyn atap ótkim keledi», dedi ol.
Sondaı-aq eks-vıse-mınıstr ózge elde ýnıversıtet fılıalyn ashý otandyq JOO úshin joǵary kórsetkish ekenin atap ótti.
