«Qaraǵandy akademııalyq mýzykalyq komedııa teatrymen jyl saıynǵy áriptestik biz úshin dástúr bolyp qana qoımaı, elordanyń mádenı ómiriniń mańyzdy bóligine de aınaldy. Osylaısha, kópshilikti mýzykalyq komedııa syndy ózge de janrlarmen tanystyra otyryp, ónerdiń jańa qyrlaryn ashamyz. Teatrdyń shyǵarmashylyq ujymy elordalyq kórermenderdi árdaıym joǵary kásibı sheberligimen, jarqyn qoıylymdarymen jáne klassıkalyq týyndylardy biregeı paıymdaýymen qýantady. Qaraǵandylyq ujymnyń árbir spektakli – kórermenderge qýanysh pen shabyt ákeletin erekshe oqıǵa ekenin bilgendikten, biz gastroldik óner kórsetýlerdi asyǵa kútemiz», dep atap ótti «Astana Opera» teatrynyń dırektory Ǵalym Ahmedıarov.
Sonymen gastrol V.Berezınniń «Kúlbıke» mýzykalyq ertegisimen ashylady. Odan soń ile-shala kórermendi I.Kalmannyń romantıkaǵa toly týyndysy «Sılva» operettasy kútedi.
Sondaı-aq aınalasyndaǵy jandardy óziniń ıdeıalarymen qyzyqtyra bilgen ózi sotqar, ózi qyzyqqumar bala týraly hıkaıany baıandaıtyn N.Makarevıchtiń «Dymbilmes» mýzykalyq ertegisi kórsetiledi. I.Shtraýstyń tańdaýly mýzykasymen jáne qyzyqty sıýjetimen tanymal «Venesııadaǵy tún» operettasy da oryndalady.
Al gastroldiń sońǵy kúni N.Makarevıchtiń «Burshaq ústindegi hanshaıym» atty balalarǵa arnalǵan mıýzıklinen bastalady. Bul shyǵarma hanshaıymnyń basynan keshken oqıǵalary men kedergileri týraly baıandaıdy. Gastroldik baǵdarlamany G.Kanchelıdiń «Hanýmanyń qýlyǵy» mýzykalyq komedııasy qorytyndylaıdy. Úlken zal sahnasynda ótetin spektakl Tıflıstegi eń epti jeńgetaı – Hanýmanyń kóptegen qyzyqty oqıǵasyn áńgimelep, kórermenderge umytylmas mýzykalyq áser syılamaq.
Aıta keteıik, tarıhy tereń Qaraǵandy akademııalyq mýzykalyq komedııa teatry operetta, mýzykalyq komedııa syndy elimiz úshin biregeı teatr janrlaryn damytyp kele jatyr. Bıyl atalǵan óner ujymy elý birinshi maýsymyn atap ótti. Teatr repertýarynda I.Kalmannyń «Baıadera», «Sılva», «Marısa», I.Shtraýstyń «Syǵan barony», «Jarqanat», «Venesııadaǵy tún», G.Kanchelıdiń «Hanýmanyń qýlyǵy» syndy basqa da álemdik klassıkalyq operetta jaýharlaryn qosa alǵanda 300-den astam qoıylym usynylǵan. Teatr mıýzıkl, shoý, balet, operalardy belsendi túrde qoıyp, tanymal rejısserlermen jáne horeograftarmen birlesip jumys isteıdi, túrli elden ártisterdi birlesken jobalarǵa qatysýǵa shaqyrady. Alǵash shymyldyǵyn ashqan ýaqyttan beri teatr alys-jaqyn shetelderdiń 200-den astam qalasynda bolyp, óner kórsetip qaıtty.
