Foto: UOK
Álııa Iýsýpovanyń aıtýynsha, tóreshiler tarapyna túsirgen shaǵym oń nátıje bermegen.
«Eljana Tanıeva óte eńbekqor sportshy. Ol óziniń alǵashqy Olımpıadasyna qatysyp, keremet áser alyp otyr. Jaqsy nátıje kórsetti dep oılaımyn. Biraq urshyq jattyǵýy úshin óte az upaı berdi. Tanıeva doppen jattyǵýda óreskel qate jiberip, dopty qolynan túsirip aldy. Al urshyq jattyǵýyn óte taza oryndap shyqty. Bir qyzyǵy, tóreshiler taza oryndalǵan urshyq jattyǵýyna doptan da tómen upaı berdi. Men birden tóreshilerge shaǵym túsirdim. Alaıda, olar shaǵymdy qanaǵattandyrǵan joq. Nelikten mundaı tómen upaı qoıǵanyn túsinbedim», dedi Álııa Iýsýpova.
Bas bapker shákirtiniń daıyndyqtaǵy taspasyn jarys kezinde paıdalanýǵa ruqsat bermeýi de kedergi keltirgenin jetkizdi.
«Jarysqa bir kún qalǵanda bizde taǵy bir jaǵdaı boldy. Eljananyń taspasynda Road to Paris degen jazý bar edi. Uıymdastyrýshylar bir kún qalǵanda mundaı jazýy bar taspamen jarysqa jiberilmeıtinin aıtty. Al sportshylar úshin ustalǵan, daıyndalǵan quralmen óner kórsetý óte mańyzdy. Tańerteń dúkennen sý jańa taspa satyp aldyq. Biraq bul taspa da jańa bolǵandyqtan, durys ushqan joq. Sodan álem chempıony, ıtalııalyq Sofııa Rafaellıden bir taspa surap aldyq. Sol úshin raqmet aıtamyz oǵan», dedi Álııa Iýsýpova.
Ol Eljana Tanıevanyń Los-Andjelestegi Olımpıada oıyndaryna qatysýǵa nıetti ekenin de tilge tıek etti.
Aıta keteıik, Eljana Tanıeva kópsaıys qorytyndysy boıynsha 13- orynǵa turaqtady. Tórt jattyǵý qorytyndysy boıynsha 126.600 upaı jınady. Bul kórsetkish kórkem gımnastshynyń júldege talasýyna jetkiliksiz boldy.
