Bul jóninde oblystyq bilim basqarmasy basshysynyń orynbasary Lýara Batyrǵalıeva habarlady. О́ńirde eki aılyq «Mektepke jol» respýblıkalyq aksııasy bastaldy. Onyń aıtýynsha, bıyl birinshi jartyjyldyqta óńirde jergilikti bıýdjet esebinen 10 370 balaǵa kómek kórsetilgen.
– Bul kómek Jalpyǵa birdeı bilim berý qorynan bólindi. Járdemdi eń aldymen memlekettik ataýly áleýmettik kómek alýǵa quqyǵy bar otbasylardan shyqqan balalarǵa, bul kómekti almasa da jan basyna shaqqandaǵy tabysy eń tómen kúnkóris deńgeıinen tómen bolǵan otbasy balalaryna, jetim jáne ata-anasynyń qamqorlyǵynsyz qalǵan balalarǵa, tótenshe jaǵdaı saldarynan shuǵyl járdemdi talap etetin otbasy balalaryna, sondaı-aq bilim berý uıymynyń alqaly basqarý organy maquldaǵan ózge de sanattarǵa beriledi. Bıyl oblys boıynsha osyndaı oqýshylarǵa 450,0 mln teńge qarajat bólinip otyr. Ol keńse taýarlaryn, mektep formasyn, sporttyq kıim, aıaqkıim taǵy basqa qajetti nárselerdi satyp alýǵa jumsalady, – dedi Lýara Qaırekenqyzy.
Búgingi kúnge 1001 oqýshyǵa járdem berý úshin olardyń ata-analarynyń kart-shottaryna jalpy somasy 43,4 mln teńge aýdarylǵan.
Joǵaryda aıtqandaı, qazir bul aksııa elimizdiń barlyq aýyl-aýdanynda ótip jatyr. Biz óńirdegi eń úlken Aqjaıyq aýdanyndaǵy ahýaldy bilý úshin aýdandyq bilim bóliminiń basshysy Erbolat Bekmoldınge habarlasqan edik.
– О́tken oqý jylynda aýdanymyzda áleýmettik qorǵalmaǵan otbasynan shyqqan 914 balaǵa 14 534 137 teńge kóleminde kómek kórsetildi. Oqýshylarǵa keńse taýarlaryn tómen baǵamen satý úshin kásipkerlerdi jappaı tarta otyryp mektep jármeńkelerin uıymdastyrdyq. Onyń ishinde Sátımola ken ornyn ıgerýshi «SRPM Resources Ltd» kompanııasy birneshe mektepke: Ǵabdolla Mahambetov atyndaǵy orta mektebine – 1 054 600 teńge, Hıýaz Dospanova atyndaǵy orta mektepke – 700 000 teńge, Taıpaq mektep-gımnazııasyna – 350 000 teńge, Qurman Baısyqov atyndaǵy orta mektepke – 1 400 000 teńge, Sarytoǵaı orta mektebine – 2 250 000 teńge, Ybyraı Altynsarın atyndaǵy orta mektepke – 1 050 000 teńge, Krasnoıar negizgi mektebine – 700 000 teńge, ıaǵnı barlyǵy 7 504 600 teńge kóleminde kómek kórsetti, – deıdi Erbolat Muratqalıuly.
Budan da bólek, Aqjaıyq aýdanynda áleýmettik osal 769 otbasynyń 1467 balasyna ótken oqý jylynda jalpyǵa birdeı mindetti bilim berý qorynan 59 511 789 teńge kóleminde materıaldyq kómek kórsetilipti. Bul – oblys boıynsha eń joǵary kórsetkishtiń biri.
Jalpy, ár mekteptiń janynan qurylǵan arnaıy alqa músheleri kómek surap kelgen ata-analardyń árbir ótinishin muqııat qarap, muqtaj jandarǵa múmkindiginshe kómek qolyn sozyp otyrady. Oral qalasynda Nurlan Sattyqov basqaratyn Qadyr Myrza Áli atyndaǵy №47 mekteptiń qamqorshylar alqasynda turǵandyqtan, osy joldardyń avtory da bul máselemen jaqsy tanys. Atalǵan mektepte 2024–2025 oqý jylyna daıyndyq barysynda az qamtylǵan 55 oqýshyǵa 43 407 teńgeden berildi.
– Taratyp aıtar bolsaq, ataýly áleýmettik kómek alatyn 20 oqýshyǵa, otbasy tabysy kúnkóris deńgeıinen tómen 31 oqýshyǵa jáne qamqorshylyqtaǵy 2 oqýshyǵa járdem berdik. Ol balalar jańa oqý jylyna daıyn. Budan bólek, tótenshe jaǵdaıǵa ushyraǵan 2 oqýshyǵa da qarjylaı kómek berildi. Aıta keteıin, ótinishter men qujattar áli qabyldanyp jatyr. Bizdiń demeýshilerimiz kópbalaly 5 oqýshyǵa mektep sómkesi men sporttyq aıaqkıim alyp berdi. Mektep qamqoryndaǵy oqýshyǵa demeýshiler 55 000 teńge kómek berdi. Osy «Mektepke jol» aksııasy aıasynda túrli mekemeler men demeýshilerge qatynas hat joldap, bastamanyń mán-mańyzyn túsindirip jatyrmyz. Aksııa jalǵasyp jatyr, – deıdi Nurlan Narımanuly.
Batys Qazaqstan oblysy
