Sýretti túsirgen – Erlan OMAR, «EQ»
Magıstratýraǵa túsý úshin 39 myńnan asa adam emtıhan tapsyrǵan. Sol úmitkerlerdiń tek 43%-y shekti ball jınady. Mine, sol shekti ball jınaı alǵandar ǵana grant konkýrsyna qatysady. Joǵaryda jazylǵandaı, talapkerlerge qujattaryn dástúrli jáne onlaın formatta tapsyrýǵa múmkindik berilip otyr.
Konkýrsqa qatysý úshin: jeke kýáliktiń kóshirmesi, joǵary bilimi týraly qujat (dıplom jáne qosymshasy); keshendi testileý sertıfıkaty jáne shet tilin meńgergenin rastaıtyn halyqaralyq sertıfıkattardy (bar bolǵan jaǵdaıda) tapsyrý qajet. Al joǵary oqý ornyna túsken jaǵdaıda 075/ý nysanyndaǵy medısınalyq anyqtamany tapsyrady. Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsete alady.
Magıstratýraǵa túsýshiler 13 myń memlekettik bilim grantyna úmitker bolady. Osyǵan deıingi materıalymyzda jazǵanymyzdaı, magıstratýrada oqýǵa eń kóp grant «Injenerlik, óńdeý jáne qurylys» salalary boıynsha mamandyqtarǵa (3 227) bólingen. Odan keıingi rette «Pedagogıka ǵylymdary» baǵyty boıynsha mamandyqtar (3 347) qarastyrylǵan. «Jaratylystaný ǵylymdary, matematıka jáne statıstıka» salalaryndaǵy mamandyqtarǵa – 1 265, «Aqparattyq-kommýnıkasııalyq tehnologııalar» salalaryndaǵy mamandyqtarǵa 1 235 grant bólindi. Al eń az grant bólingeni – «Densaýlyq saqtaý jáne áleýmettik qamtamasyz etý» (225), «Qyzmet kórsetý» (315) salalaryndaǵy mamandyqtar.
Magıstratýrada oqýǵa arnalǵan bilim berý granty talapkerler tapsyrǵan keshendi testileý nátıjeleri boıynsha konkýrstyq negizde taǵaıyndalady. Magıstratýrada oqýǵa bilim grantyn ıelengenderdiń tizimi 26 tamyzǵa deıin Ǵylym jáne joǵary bilim mınıstrligi men Ulttyq testileý ortalyǵynyń resmı saıtynda jáne áleýmettik jelilerinde jarııalanady. Al bolashaq magıstranttardyń oqýǵa qabyldanýy 28 tamyzǵa deıin aıaqtalady.
