Aldymen Prezıdent tapsyrmasyn oryndaý maqsatynda elimizdiń Joǵary bilim men ǵylymdy damytýdyń 2023-2029 jyldarǵa arnalǵan tujyrymdamasyna joǵary bilim berý sapasyn jáne ǵylymı zertteýlerdiń nátıjeliligin arttyrýǵa baǵyttalǵan ózgeris engizildi. Máselen, joǵary oqý oryndaryndaǵy professor-oqytýshy quramynyń jalaqy mólsheri 160,7 myń teńgeden 350 myń teńgege deıin, ulttyq joǵary oqý oryndarynda 228,8 myń teńgeden 400 myń teńgege deıin ósti. Al byltyrǵy birinshi qańtardan bastap ǵylymı uıymdar qyzmetkeriniń laýazymdyq jalaqysy 18 paıyzǵa artsa, bıylǵy qańtardan olardyń eńbekaqysy taǵy da 18 paıyzǵa, kelesi jylǵy qańtardan 17 paıyzǵa kóbeıedi.
Budan bólek, «Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» zańda kózdelgen normalar sheńberinde ǵylymı ataqtardyń bolýy úshin ǵylymı qyzmetkerlerge qosymsha aqy mólsheri ulǵaıtyldy. Bul zańǵa Memleket basshysy bıylǵy 6 mamyrda qol qoıdy.
Zańǵa engizilgen túzetýlerdiń birinshi jelisi pedagogter men ǵylymı qyzmetkerlerdiń materıaldyq jaǵdaıyn jaqsartýǵa arnalǵan. Atap aıtqanda, belgili bir ǵylymı dárejesi men ataǵy bar pedagogter úshin aı saıyn tólenetin qosymsha aqy mólsheri kóbeıdi.
Máselen, fılosofııa doktory (PhD), beıini boıynsha doktor dárejesi úshin 17 AEK; fılosofııa doktory dárejesi (PhD) jáne qaýymdastyrylǵan professor (dosent) ǵylymı ataǵy, beıini boıynsha doktor dárejesi jáne qaýymdastyrylǵan professor (dosent) ǵylymı ataǵy úshin 25 AEK; ǵylym kandıdaty ǵylymı dárejesi úshin 17 AEK, ǵylym doktory ǵylymı dárejesi úshin 34 AEK; ǵylym kandıdaty ǵylymı dárejesi jáne qaýymdastyrylǵan professor (dosent) ǵylymı ataǵy úshin 25 AEK, ǵylym doktory ǵylymı dárejesi jáne qaýymdastyrylǵan professor (dosent) ǵylymı ataǵy úshin 42 AEK; fılosofııa doktory (PhD) dárejesi jáne professor ǵylymı ataǵy, beıini boıynsha doktor dárejesi jáne professor ǵylymı ataǵy úshin 50 AEK; ǵylym kandıdaty ǵylymı dárejesi jáne professor ǵylymı ataǵy, ǵylym doktory ǵylymı dárejesi jáne professor ǵylymı ataǵy úshin 50 AEK mólsherinde aı saıynǵy qosymsha aqy belgilenedi.
Ǵylymı dárejesi men ataǵy úshin osyndaı aı saıynǵy qosymsha aqy negizgi jumys ornynda ǵylymı-zertteý júrgizetin ǵylymı qyzmetkerlerge de belgilendi.
Sondaı-aq 40 jasqa tolmaǵan talantty jas ǵalymdarǵa joǵary nemese joǵary oqý ornynan keıingi bilim berý uıymynyń endaýment-qorynyń ınvestısııalyq kiris qarajatynan stıpendııa alý quqyǵy berildi.
