Foto: krisha.kz
Bankterdiń qurylys salýshylarmen jáne memlekettik baǵdarlamalarmen seriktestik baǵdarlamalarynan tys kommersııalyq ıpoteka boıynsha jyldyq tıimdi syıaqy mólsherlemesi (JTSM) 17,2%-dan bastalady («Freedom Bank»). Mólsherlemeler «Sentr Kredıt Bankinde» – 18,7%, «Altyn Bank»-te – 19,4%, «Qazaqstandaǵy Qytaı Bankinde» 26%-dan bastalady. Jalpy, barlyq banktiń mólsherlemesi kiristerdi rastaý faktoryna, qaryz alýshynyń olardyń klıenti ekendigine, onyń ishinde jalaqy jobalary boıynsha, ónim boıynsha komıssııalardyń bolýyna nemese bolmaýyna baılanysty.
Sektordaǵy ıpotekalyq qaryzdyń maksımaldy merzimi (KZI Banki) 5 jyldan («Freedom Bank», «Halyk Bank», «Altyn Bank», «ForteBank», «Shınhan Bank», «Nurbank») 20 jylǵa deıin sozylady. Bastapqy jarnanyń eń tanymal nusqasy 20%-dan bastap ózgeredi. Mundaı sharttardy sektorda 4 bank usynady.
«Jalpy, mólsherlemeler óte joǵary. Neǵurlym qyzyqty nusqalardy ázirleýshilermen birlesken seriktestik baǵdarlamalar segmentinde ǵana tabýǵa bolady. Munda JTSM 6,2% («Bank RBK» ónimderi) jáne 7,2%-dy («Freedom Bank») quraýy múmkin. Biraq bul segmentte mólsherlemeler jıi joǵary ekeni baıqalady: «Bank RBK»-da JTSM – 24,8%-dan, «Freedom Bank»-te – 17,2%-dan, «Sentr KredıtBankinde» – 19,7%-dan, «Halyk Bank»-te 19,2%-dan bastalyp tur», deıdi «Finprom» sarapshylary.
Bıyl eki jańa memlekettik baǵdarlama – «Otaý» jáne «Naýryz» baǵdarlamalary bastaldy. Ekeýiniń de basty artyqshylyǵy – uzaq merziminde (19 jylǵa deıin), sondaı-aq mınımaldy JTSM qarastyrylǵan. Sonymen qatar bul baǵdarlamalarǵa halyqtyń áleýmettik osal toby qatysa alady. Sondyqtan mundaı baǵdarlamalar áleýmettik sala úshin úlken mańyzǵa ıe.
«Máselen, «Otaý» baǵdarlamasy boıynsha JTSM 9,2%-dan bastalady, al jınaqtalǵannan keıin qaryz somasynyń 50%-y qaryz alýshynyń sanatyna, jınaqtaý merzimine jáne basqalaryna baılanysty nebári 3,6%-6,9%-ǵa deıin tómendeıdi. «Naýryz» baǵdarlamasy boıynsha jaǵdaı odan da tıimdirek: munda JTSM halyqtyń áleýmettik osal toby úshin 7,3%-dan bastalady, sodan keıin 3,6%-ǵa deıin tómendeıdi. «Naýryz» baǵdarlamasynyń «Otaý» baǵdarlamasynan taǵy bir aıyrmashylyǵy – qatysýshylarǵa qoıylatyn talaptarda. Máselen, 1 mln teńge kólemindegi eń tómengi jınaq talaby eki memlekettik baǵdarlama úshin de sáıkes keledi, alaıda «Otaýǵa» qatysý úshin bankte keminde 18 aı jınaqtaý qajet bolsa, «Naýryz» baǵdarlamasy boıynsha mundaı shekteýler joq», delinedi habarlamada.
Qos joba boıynsha da ótinim qabyldaý aıaqtalyp qoıdy. Alaıda «Otbasy banki» bıyl kúzde qosymsha múmkindik jarııalaýdy josparlap otyr. Sondaı-aq eki baǵdarlama keler jyly da jalǵasyn tabady.
