Zııatkerlik báıge

Bul toptyq oıynǵa qatysýshylar 8-10 adamnan komanda bolyp tirkelip, aldyn ala jazylady. Jarys «Kiris­pe», «Qısyn», «Medıa», «Baılanys», «Kúr­deli», «Táýekel» degen alty kezeńnen tura­dy. Sáı­kesinshe, ár kezeńniń suraqtary da ártúrli.

Oıynnyń uıymdastyrýshysy Mereı Ermuhannyń aıtýynsha, bul zııatkerlik saıystyń maqsaty – jastardyń oı-órisin, bilimin jetildirý, bos ýaqytyn tıimdi ótkizýge járdemdesý.

– «IQas» 2022 jyly «Elarnadaǵy» telejobadan bastalǵan edi. 2023 jyly ujymdar arasyndaǵy lıgaǵa aınaldy. Alaıda qazir ujymdar oıyny jobamyzdyń tek bir bólshegi ǵana. Bilimpazdar básekesi Astanada osymen on tórtinshi ret ótip otyr. Jarysty júıeli túrde eki apta saıyn uıymdastyramyz. Jalpy, jobanyń ataýynda ózindik mán bar. Birinshiden, muny aqyldylar aıqasy dep túsinsek bolady. Ekinshiden, «IQas» degendegi «IQ» aqyl-oı qabiletiniń kórsetkishin bildiredi. Sonda «Aqylyń saǵan as bolsyn, azyq bolsyn» degen maǵyna jatyr munda.

– Baıqap otyrmyz, bir oıynda jalpy sany qyryq tórt suraq bolady eken. Qıyn saýaldyń qııýyn kelistirý de ońaı emes. Sonyń bárin qansha ýaqytta quraısyz?

– Men sizge qyzyq aıtaıyn. Keıbir suraq 15 sekýndta daıyn bolady. Oılanyp, tolǵanyp, úsh jyl quraǵan suraqtarymyz da bar. Saýalymyzdy barynsha tarıhı-mádenı baǵytta qoıýǵa tyrysamyz.

– Osyǵan deıingi oıyndarda tirkelgen rekordtyq kórsetkish bar ma?

– Jaqynda 23 komanda qatysqan sa­ıys boldy. Ár topta kemi bes adamnan bolsa, olardyń qanshalyq kóp bolǵanyn ózińiz elestete berińiz. Demek qoǵam tarapynan qyzyǵýshylyq joǵary. Odan bólek, bir oıyn­da 54 upaıdan 51 upaı alǵan toptar da boldy. Bul – bizdiń básekege turaqty qatysqan oıynshylardyń nátıjesi.

– Bilýimizshe, «Quiz» oıyndarynyń ıgi­ligin qatysýshylar ǵana kórmeıdi. «Tu­tyný­shy bar jerde, tabys bar» degendi es­kersek, bul ıntellektýaldy saıysty bız­nestiń bir bólshegi deýge de keletin sekildi?

– Iá, árbir qatysýshy tarapynan 2000-3000 teńge kóleminde jarna tólenedi. Osy qarjydan tolyqtaı ótetin orny, dıplomda­ry, syılyqtar, foto jáne vıdeo túsirilim óte­ledi. Biraq uıymdastyrýshylar «Quiz» oıyn­daryn tabys úshin ótkizbeıdi. Bul jerde kó­bine shyǵarmashylyq, rýhanı azyq basty ny­sanada. Keıde stýdentterdi tegin qatys­ty­ramyz. Birinshi ret kelgenderden de aqy su­ramaımyz. Bizdiń jobaǵa qyzyqqan árbir aza­mat óziniń oblysynda, qalasynda dál osy qazaq­sha ıntellektýaldy oıyndy franshıza ar­qyly uıymdastyrsa bolady. Máselen, qazir Aty­raý qalasy qolǵa aldy. Endi aldaǵy ýaqyt­ta Almaty, Aqtóbe, Túrkistan sekildi qala­larda «IQas»-tyń esigin aıqara ashsaq degen oıy­myz bar. Maqsatymyz – qazaqy ıntellektýal ortany qalyptastyrý, – deıdi Mereı Ermuhan.