Aıtýly is-sharanyń ashylýynda sóz alǵan Oqý-aǵartý birinshi vıse-mınıstri Natalıa Jumadildaeva forýmnyń mańyzyna toqtala kelip, muǵalim – elimizdegi resmı mártebesi belgilengen jalǵyz mamandyq ekenin jetkizse, «Nazarbaev zııatkerlik mektepteri» DBBU basqarma tóraǵasy Ánýar Janǵozın osymen úshinshi márte ótip otyrǵan forýmnyń jas muǵalimderdiń basyn qosatyn tamasha dástúrge aınalǵan alań ekenin atap ótti. Al «Esen Foundation» jáne «Ansa» qorlary konsorsıýmynyń ókili Kamıla Basharova is-shara mazmuny týraly aıta kelip, «Bala kimdi jaqsy kórse, sodan úırenedi. Synypqa kirgende, aldaryńyzda elimizdiń bolashaǵy turǵanyn únemi este saqtańyzdar», dep pedagog jaýapkershiligi jaıynda salmaqty oı sabaqtady.
Forým erkin formatta ótti. Oǵan Oqý-aǵartý mınıstri Ǵanı Beısembaev qatysyp, jas muǵalimdermen emin-erkin áńgimelesip, olardyń qoıǵan suraqtaryna jaýap berdi. Mınıstr áńgime barysynda pedagog mamandyǵynyń mańyzyna keńirek toqtaldy.
«Pedagog mamandyǵy – bul qyzmet qana emes, elimizdiń bolashaǵyn qalyptastyrý jolyndaǵy abyroıly mindet. Biz balalarymyzdyń oqýy men damýy úshin barlyq jaqsy jaǵdaıdy qamtamasyz etýimiz kerek», degen Ǵanı Bektaıuly pedagogtik jumys barysynda oqýshylarmen jaqyn jumys isteý, olardyń psıhologııalyq erekshelikterin taný, bilim berý úderisinde jasandy zerdeni qoldaný, fýnksıonaldyq saýattylyqty qalyptastyrý jáne emosıonaldyq ıntellektini damytý týraly máselelerdi sóz etti.
Sondaı-aq is-shara barysynda jas pedagogter «Ár sabaqty qalaı erekshe etýge bolady: meniń tájirıbem» jáne «Edunext: bolashaqtaǵy sıfrlyq bilim» atty tanymdyq sheberlik saǵattaryn júrgizip, bir-birimen tájirıbe almasyp, oı bólisti.
Ásirese forýmda «Qanattylar» ınklıýzıvti teatrynyń kórkemdik jetekshisi Arnur Ysqaqov, Shyǵys Qazaqstan oblysy Qulynjon aýlyndaǵy «Mektep-bóbekjaı-balabaqsha kesheniniń» dırektory Aralbek Berikuly dýshanbelik mekteptiń dırektory Mehron Ortıkov, «Aıchýrek» Bishkek kyzdar lıseıiniń dırektory Erlan Satarov, Áleýmettik ınnovatorlar qaýymdastyǵynyń prezıdenti Emın Askerov jáne joǵaryda atalǵan bilim berý uıymynyń túlegi ári derbes sarapshysy Laýra Vaıgorovanyń motıvator-kóshbasshy retinde ózderiniń qol jetkizgen jetistikteri týraly aıtqan qyzyqty áńgimeleri men tájirıbeleri ár aımaqtan kelgen jas muǵalimderge qanat berip, shabyttandyrdy.
