Foto: baq.kz
Monıtorıng barysynda elimizdiń barlyq mektebindegi aǵymdaǵy jóndeý jumysy támamdalyp, al kúrdeli jóndeý jumysy 280 bilim mekemesinde jalǵasyp jatqany anyqtalǵan. Sondaı-aq robottehnıka, hımııa, bıologııa, fızıka jáne STEAM-baǵyttarǵa arnalǵan 1383 pándik kabınet satyp alý boıynsha jumystar belsendi atqarylyp jatyr.
Búginde bilim berý uıymdarynyń oqýlyqtarmen qamtamasyz etilýi 90 paıyzdy quraǵan. Sondyqtan bilim basqarmalarynyń basshylaryna mektepterdi oqýlyqtarmen qamtý boıynsha jumysty jedeldetip, ony oqýshylarǵa 25 tamyzǵa deıin taratý tapsyryldy.
«Biz monıtorıng kezinde aımaqtaǵy barlyq mekteptiń jaǵdaıy men jańa oqý jylyna daıyndyǵyn muqııat tekserdik. Basty maqsatymyz – oqýshylarǵa qaýipsiz ári jaıly jaǵdaı jasaý. Jańa oqý jylyn jemisti bastaý úshin jergilikti atqarýshy organdarmen tyǵyz baılanysta jumys isteýdi jalǵastyramyz», deıdi Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Ernur Daýenov.
Aıta keteıik, aldaǵy 1 qyrkúıekten elimizdegi 7,9 myń bilim uıymynda 3,9 mln oqýshy bilim alady. Soǵan baılanysty Oqý-aǵartý mınıstrligi aımaq ákimdikterine mektepterdi iske qosý merziminiń keshikpeýine jol bermeý úshin barlyq qajetti sharany qabyldaýdy usyndy.
