Jerlester tańdaý jasady

«Egemen Qazaqstannyń» menshikti tilshisi Dáýren BAÝYRJANULY Beıjińnen habarlaıdy: Shet memleketterde júrgen otandastarymyz da saılaý kúni azamattyq boryshy týraly umytpady. Jyraqta júrse de jerlesterimiz jergilikti dıplomatııalyq ókildikterine baryp daýys berdi. Basty saıası naýqan merziminde Qytaı Halyq Respýblıkasy terrıtorııasynda bolǵan Qazaqstan azamattary erekshe belsendilik tanytty. Qytaı Qazaqstanmen shekaralas ári jaqyn strategııalyq seriktes memleket bolǵandyqtan, munda qazaqstandyq azamattar jıi barady. Olar kóbinese oqýǵa, emdelýge, týrızm jáne qyzmet babymen kórshi elge sapar shegedi. Saılaýshy retinde tirkelgen adam­dardyń tolyǵy derlik keshe konstı­tý­sııalyq quqyqtaryn paıdalanyp, ózde­riniń qalaǵan kandıdattaryna daýys berdi. Qytaı ýaqyttyq beldeýi Asta­na­dan eki saǵat alda. Qytaıdaǵy saılaý jer­gilikti ýaqyt boıynsha jetide, al biz­she beste bastaldy. Tek Beıjiń­niń ózinde bir kún ishinde 1,5 myń, al Shanhaıda 400-ge jýyq adam óz tańdaýyn jasady. Jalpy Beıjiń, Gongkong, Shanhaı, Úrimji qalalarynda ornalasqan saılaý ýchaskelerine kelip daýys berýshiler merekelik kóńil-kúıde boldy. Saılaýshylardyń basym bóligin quraıtyn stýdentterdiń kóbi úshin bul tuńǵysh saılaý. Sondyqtan elgezek ­jastarymyz buǵan asa jaýapkershi­lik­pen qarady. Olardyń aıtýynsha shet memlekette júrip óz elińde bolyp jatqan saıası naýqanǵa atsalysý múmkindigi – memleketimizdiń egemendigin, táýelsizdigin, álem arenasyndaǵy be­deliniń aıǵaǵy. Beıjińdegi qazaqstandyq stýdentter uıymynyń jetekshisi Áshim Duryskeldi saılaýdy óz ómirindegi eń eleýli oqıǵa dep biledi. «Bul meniń tuńǵysh ret memleket taǵ­dyryna, tarıhyna qosqan úlesim. Osy tek­tes sharalar, jastardy, jalpy ha­lyqty patrıottyqqa tárbıelep, bir­likke sha­qyrady. Sondyqtan búgingi tańda saılaý – eń mańyzdy sharýa», – dedi ol. Qytaıda bilim alyp jatqan barsha stýdentterdiń tilegi de osyǵan saıady. Eń bastysy, olar el taǵdyryna beıjaı qaraı almaıtynyn kórsetti. Jalpy, bul elde turyp jatqan jerlesterimiz azamattyq belsendiligin tolyq tanytty deýge tolyq negiz bar.