2014 jyly Rýdnyı qalasynda iske qosylǵan biregeı kásiporyn taıaýda oblys ortalyǵyna kóshirildi. Buǵan deıin joǵary voltty elektr jelileri úshin jylyna 500 myńdaı oqshaýlaǵysh shyǵaryp kelgen zaýyt endi ónim kólemin 1,5 mln-ǵa deıin ulǵaıtty. О́nimderin О́zbekstan, Estonııa, Qytaı, Kamerýn, Týnıs, Túrkııa, Polsha, Brazılııa elderine eksporttaýdy kózdep otyr.
Zaýyttyń atqarýshy dırektory Samat Múkenovtiń aıtýyna qaraǵanda, álemde mundaı 13-aq kásiporyn bar. Osy on úshtiń ortasynan oıyp turyp oryn alǵan Qostanaı armatýra-oqshaýlaǵysh zaýytynyń ónimderi joǵary suranysqa ıe.
«Onjyldyq tarıhy bar kásiporyndy bıyl Rýdnyı qalasynan Qostanaıǵa kóshirý týraly sheshim qabyldandy. Oblys ortalyǵyndaǵy jumysymyz tabysty bolady dep senemiz. Buǵan deıin de joǵary kórsetkishterge qol jetkizdik. Jumyskerlerdiń jalaqysy ósti. Buryn olar qolyna 168 myń teńge alyp kelse, endi 268 myń teńge alady. Jumysshy eńbegi laıyqty baǵalanýy kerek. Bizdiń zaýyt – elimizdegi elektr jelisine arnalǵan shyny ızolıatorlardyń barlyq túrin óndirýge ındýstrııalyq sertıfıkatqa ıe biregeı ári jalǵyz kásiporyn. Sondyqtan óz ónimimizdiń sapasyna jáne qaýipsizdik talaptaryna saı ekenine kepildik beremiz. Zaýyt tek elimizdiń emes, birtalaı shet memlekettiń energetıka salasyn damytýǵa barynsha atsalysady. Búginde eksport kólemin ulǵaıtyp, alys-jaqyn shetelderge ónim jetkizýdi bastadyq», deıdi kásiporyn basshysy Artem Býtın.
Kásiporynnyń turaqty tutynýshylarynyń qatarynda «Qazaqstan temir joly», «KEGOC», «QazTransOıl», «Qazaqmys» syndy iri kompanııalar bar.
«Qazaqstan armatýra-oqshaýlaǵysh zaýyty» JShS – TMD keńistigindegi eń iri zaýyt Ońtústik – Oral armatýra-oqshaýlaǵysh zaýytynyń enshiles kompanııasy ekenin aıta ketken jón. Kásiporyn qala bıýdjetine salyq túrinde qomaqty qarjy quıyp otyr. Rýdnyıda jumys istegen sońǵy 4 jyl ishinde qala bıýdjetine 5 mlrd teńgege jýyq salyq tólegen.
Oqshaýlaǵysh zaýyty, qazirshe, tolyq sıkldi óndiriske kóshe qoıǵan joq. Kásiporynǵa qajet shıkizat jylyna 10 mln shyny bólshek daıyndaıtyn Ońtústik – Oral zaýytynda daıyndalady. Al armatýralar Orsk – Halılov metall kombınatynda quıylady.
«Sońǵy on jyl ishinde 4,2 mln ızolıator shyǵardyq. Búginge deıin 11,6 mlrd teńgege ónim satyppyz. О́nimderimizdi eldegi energııalyq kompanııalardyń bári alady. Jalpy, elimizde ızolıatorlarǵa suranys joǵary. Osy suranysty óteý úshin jylyna 1 mln-ǵa jýyq oqshaýlaǵysh shyǵarýymyz kerek. Otandyq kompanııalardan artylǵanyn Reseıge, Ázerbaıjanǵa, tipti О́zbekstan, Qyrǵyzstan elderinde Qytaı kompanııalary salyp jatqan nysandarǵa da jiberemiz», deıdi zaýyt basshysy.
Oqshaýlaǵyshtar arnaıy vıbrasııalyq stanoktardyń kómegimen daıyndalady. Odan keıin arnaıy qurylǵy arqyly daıyn ónimniń beriktigi synalady.
«Mundaı qurylǵymen jumys isteý asa qıyn emes. Tek tehnologııa men qospa mólsherin qatań saqtap otyrý kerek. Shyny jáne farfor ızolıatorlardy nyǵaıtqysh sement eritindisin daıyndaý barysynda qajet qospalar mıkronmen ólshenedi. Odan artyq eshteńe qosýǵa bolmaıdy. О́nim daıyn bolǵan soń, jeti táýlik boıy kebedi. Odan keıin oqshaýlaǵysh boıyndaǵy búkil ylǵaldan ada bolǵansha, taǵy da jeti kúnge arnaıy kameraǵa salamyz. Odan keıin ızolıatorlar synaq sehyna jiberiledi», deıdi atqarýshy dırektor Samat Múkenov.
Kásiporyn aldaǵy ýaqytta elektr baǵanasyna jeli bekitetin armatýrany ózimizden shyǵarý máselesin qarastyryp jatyr.
Qostanaı oblysy
