Sýretti túsirgen – Asylhan SEIDAHMET
Túrkistan oblysyndaǵy «Taý samaly» demalys aımaǵynda ótip jatqan lager 21 tamyzda bastaldy. Basqosýda jastar toptarǵa bólinip, túrli pikirtalastar ótkizdi. «Jastar rýhy» jastar qanatynyń tóraǵasy Aqerke Iskanderovanyń aıtýynsha, elimizdiń barlyq óńirinen jınalǵan delegattar tek jastar qanatynyń qyzmetin jaqsartýǵa emes, sonymen qatar memlekettiń damýyna baǵyttalǵan ekonomıkalyq, áleýmettik, mádenı sıpattaǵy tyń ıdeıalary men baıypty bastamalaryn usyna alady.
– Lager jastardyń jańa býynyn qalyptastyrýǵa baǵyttalǵan. Árbir jas azamat memleket isine belsendi aralasýǵa tıis. Prezıdent Qasym-Jomart Toqaev el jastary ózin-ózi udaıy jetildirip, jan-jaqty damytyp otyrýy qajet ekenin atap ótken bolatyn. Saıası jańǵyrtý jumysyn jalǵastyrý úshin tıisti kadrlardy daıarlaý qajet. Is-sharanyń basty maqsaty – talantty jastardyń basyn biriktirip, Jastar qanatynyń qataryna belsendi azamattardy tartý. Jalpy, «Jastar rýhynyń» basym baǵyttarynyń biri – elimizdiń qoǵamdyq-saıası ómirindegi jastardyń rólin arttyrý, – dedi ol.
Jalpy, «Amanat» partııasyndaǵy jobalar men bastamalardy iske asyrýda jastar da belsendilik tanytyp júr. Osy oraıda «Jastar rýhy» jastar qanaty Túrkistan oblystyq fılıalynyń tóraǵasy Janserik Juman lager jastar qaýymynyń áleýetin arttyrýdy kózdeıtinin atap ótti.
– Lagerge qatysýshylar – óz óńirleriniń qalyptasqan jas kóshbasshylary ǵana emes, sonymen qatar isin jańadan bastaǵan belsendiler, sondaı-aq sý tasqyny, Qostanaı jáne Abaı oblystaryndaǵy orman órti, Ekibastuzdaǵy tótenshe jaǵdaı kezinde jáne ózge de oqıǵalar barysynda ózderin tanytqan volonterler. Bul – belsendi jastar pikir, tájirıbe almasatyn, patrıotızm men jaýapty azamattyq ustanym qalyptastyratyn taptyrmas alań, – dedi ol.
Saıası lagerde jastar úshin jeke jáne kásibı qasıetterin damytýǵa arnalǵan túrli baǵyttaǵy trenıngter men tımbıldıngter ótedi. Is-sharada psıholog Erjan Myrzabaev, saıası keńesshi Nazym Janǵazınova, telejúrgizýshi Áıgerim Esenáli, jýrnalıst Sandı Sultan, taǵy basqa sarapshylar qatysýshylarǵa arnap oqytý semınarlaryn ótkizedi. Sondaı-aq jas belsendilerge Májilis depýtattarynyń, «Amanat» fraksııasy músheleriniń qatysýymen «Bir tolqynda» dıalog alańy uıymdastyrylady.
– Respýblıkalyq lager jastardyń mansap jolyndaǵy alǵashqy qadamy bolatynyna senimdimiz. Munda tanymal sarapshylar, túrli saladaǵy bilikti mamandar bizge kommýnıkasııa jáne PR negizderin úıretip, saıasattaný jáne otbasylyq, qoǵamdyq qatynastar boıynsha arnaıy kýrs uıymdastyrady. Men osynda bilimimdi jetildirip, tyń áser alý jáne jańa dos tabý úshin keldim, – dedi lager qatysýshysy Almat Esenbekov.
QUIZ oıyndary barysynda jastar túrli baıqaýlarǵa, qyzyqty ıntellektýaldy-saýyq keshinde baqtaryn synaıdy. Jıyn aımaqtardyń konserttik nómirlerimen jalǵasady.
