Eske sala keteıik, Azat Málik – «Astana Opera» halyqaralyq opera akademııasynyń, sondaı-aq Ferens Lıst akademııasynyń túlegi. Onyń Majarstan memlekettik opera teatrymen tyǵyz baılanysy Býdapeshtte magıstratýrada oqyp júrgende, Eva Marton baıqaýyndaǵy jeńisinen keıin bastalǵan edi. Buǵan deıin ol Majarstan sahnasynda A.Ponkellıdiń «Djokonda» operasyndaǵy Barnabanyń, J.Bızeniń «Karmen» operasynda Eskamılonyń, Dj.Pýchchınıdiń «Bogema» operasynda Shonardyń rólderin oıdaǵydaı oryndady.
«Buıyrsa, qyrkúıek-qazan aılarynda «Qytaıdaǵy Nıkson» operasynyń 5 spektakline qatysamyn. Ol jerde Qytaı Halyq Respýblıkasy qurylǵannan bastap, ómiriniń sońyna deıin osy eldiń Memlekettik keńesiniń birinshi premer-mınıstri bolǵan Chjoý Enlaıdyń basty rólin somdaımyn. Osyǵan deıin Majarstan memlekettik opera teatrynda birqatar spektaklde óner kórsetken edim. Sondyqtan osy el men úshin sondaı ystyq, adamdary da meıirimdi. Al kórermeni operany jaqsy qabyldaıdy. Ár spektaklden keıin izgi tilekterin aıtyp, áserlerimen bólisedi, qaıtadan sol sahnada qýana kútedi», deıdi Azat Málik.
«Ustazym – Majarstannyń Halyq ártisi, álemge áıgili opera ánshisi, F.Lıst atyndaǵy Majarstan ulttyq mýzyka akademııasynyń professory Eva Marton, al konsertmeısterim – osy akademııanyń professory Katalın Alter jaqyn jandarymdaı bolyp ketti. Maǵan senim artyp, arnaıy shaqyrǵandary úshin atalǵan eldiń memlekettik opera teatryna rızashylyǵymdy bildirgim keledi. Qashan barsam da, tórin usynyp, jaqsy qarsy alyp jatady», dedi opera ánshisi.
Sondaı-aq ol ózi de Ferens Lıst akademııasynyń túlegi ekenin, sol sebepti Majarstanǵa joly túskende árdaıym óz úıine barǵandaı bolatynyn atap ótti.
«Qytaıdaǵy Nıkson» jaıly aıtatyn bolsaq, bul – Djon Adamstyń eń alǵashqy operasy. Týyndy Rıchard Nıksonnyń 1972 jyly aqpanda Qytaıǵa jasaǵan mańyzdy sapary jaıly baıandaıdy. Kompozıtor ónerdiń tilimen saıasat pen álemdik ahýalǵa ózindik kózqarasyn bildirýge tyrysqan. Mýzyka synshylary ony birden qazirgi zamanǵy eń jaqsy operalardyń biri dep baǵa berdi. Operanyń álemdik premerasy 1987 jyly Tehas shtatynyń Hıýston qalasyndaǵy Grand Opera teatrynda ótti. Al Majarstan memlekettik opera teatrynyń sahnasynda maýsymnyń ashylýyna oraı alǵash ret qoıylmaqshy», dedi ol.
О́nerpazymyz oryndaıtyn opera postmoderndik aǵymdar aıasynda mýzykalyq mınımalızm stılinde jazylǵan. «Qytaıdaǵy Nıkson» operasynyń vokaldyq partııalarynyń bir ereksheligi – áýezdi aıtylý stıline baǵyttalǵan. Keıipker partııalarynyń áýezdiligi keń emes, olar buryshtyq maqamymen, jeke dybystardyń qaıtalanýymen, sazdy jáne yrǵaqty úlgilerdiń shematızmimen erekshelenedi. Sonymen qatar úshinshi akt keıipkerleriniń bólikteri kúrdelene túsedi, bul vokaldyq sıpattamalardyń dáıekti tereńdeýin kórsetedi. Aıta keteıik, barıtonnyń mundaı stılin birinshi ret oryndaıyn dep tur. Sondyqtan da bul opera qazaq ónerpazynyń repertýaryndaǵy premerasy bolmaq.
Sondaı-aq Azat osy teatrda 2024 jyldyń qarasha, jeltoqsan aılarynda Dj.Verdıdiń «Falstaf» operasynyń 9 qoıylymynda, 2025 jyldyń naýryz, sáýir aılarynda Dj.Pýchchınıdiń «Batystan kelgen qyz» operasynyń 10 qoıylymyna qatysatynyn aıta ketýimiz kerek. Buǵan qosa, árıne, jańa maýsymda «Astana Opera» sahnasynda da el kórermenderimen qaýyshady.
