Qala turǵyndary men qonaqtary qazaqtyń dástúrli murasyn beıneleıtin jarqyn kompozısııalaryn tamashalady. Aspanda kıiz úı, taıqazan, shubat quıylǵan tostaǵan, túıeli kerýen jáne asyq beıneleri kórinis tapty.
Bul obrazdar kóshpeli mádenıetti, bereke-birlikti, kúsh-qýat pen ulttyq bolmysty bildiredi.
Sondaı-aq, aspanda kóktemniń kelýi men tabıǵattyń jańarýyn aıshyqtaıtyn úsh ólshemdi qyzǵaldaq beınesi paıda boldy. Kún men aıdyń kórinisteri kún men túnniń teńelgenin meńzeıdi.
Shoýdyń sońynda «Naýryz qutty bolsyn!» degen jazý kórinis tapty.
Eske salaıyq, Astanada 22 naýryz kúni Naýryz meıramyna arnalǵan aýqymdy is-sharalar jalǵasady. Negizgi alańdarda ulttyq taǵamdar men qolóner buıymdary usynylatyn jármeńkeler men fýd-korttar jumys isteıdi, sheberlik saǵattary men dástúrli rásimder kórsetiledi.
Sol sııaqty qazaqsha kúres, sadaq atý, gir sporty, qol kúresi jáne asyq atý boıynsha jarystar uıymdastyrylyp, jeńimpazdarǵa baǵaly syılyqtar tabystalady.
