Foto: Qorǵanys mınıstrligi
Sharaǵa Qorǵanys mınıstrliginiń, Qosshy qalalyq ishki saıasat bóliminiń ókilderi, eńbek jáne soǵys ardagerleri, sondaı-aq mektep oqýshylary qatysty. Aıryqsha sátterdiń biri – 102 jastaǵy ekinshi dúnıejúzilik soǵysynyń ardageri, 102 jastaǵy Nurqasym Ájitaevtyń qatysýy boldy. Bul urpaqtar sabaqtastyǵy men maıdangerler erligine degen qurmettiń jarqyn kórinisi retinde baǵalandy.
«Abyroı men mindetti, paryz ben áskerı antty, ádildikti mansaptan bıik qoıǵan tulǵalarmen qatar turý – biz úshin úlken mártebe. Jerlesimiz Raqymjan Qoshqarbaevtyń ónegeli ómiri men maıdandaǵy erligi jastarǵa úlgi», dedi Tárbıe jáne ıdeologııalyq jumys departamentiniń ardagerlermen jumys basqarmasynyń bastyǵy, polkovnık Qaırat Ydyryshev.
Qaraǵandylyq maıdangerge Qorǵanys mınıstriniń quttyqtaý haty tabystaldy
Qorǵanys mınıstrliginiń málimetinshe, is-shara barysynda qatysýshylar batyrdyń rýhyna bir mınýt únsizdikpen taǵzym etti. Ardagerler jas býynǵa batasyn berip, eldik pen erlik týraly ósıet aıtty. Mektep oqýshylary patrıottyq rýhtaǵy óleńder oqyp, soǵys taqyrybyndaǵy shyǵarmalardy oryndady.
Sonymen qatar, elordadaǵy Raqymjan Qoshqarbaev eskertkishinen Taıtóbe aýylyna deıingi 30 shaqyrymdyq velosherý uıymdastyryldy. Tórt ardager veloshabandoz bul bastamany batyrdyń erligine arnady.
Budan eki jyl buryn ashylǵan eskertkish búginde áskerı-patrıottyq sharalardyń negizgi ortalyǵyna aınalǵan. Taǵylymdy is-shara Raqymjan Qoshqarbaevtyń erligi urpaq jadynda máńgi saqtalatynyn taǵy bir márte aıǵaqtady.
