Festıvaldiń basty maqsaty – ulttyq jáne álemdik ashananyń úzdik úlgilerin keńinen tanystyrý. Kelýshiler qazaqtyń dástúrli taǵamdarynan bastap, eýropalyq jáne azııalyq ashananyń túrli dámin tatyp, kópultty mádenıettiń erekshelikterimen tanysýda. Alańda Naýryz meıramynyń basty taǵamy – naýryz kójeniń birneshe túri usynylyp jatyr.
Is-sharaǵa Qazaqstannan jáne shetelderden kelgen halyqaralyq deńgeıdegi 10 aspaz qatysýda. Olar avtorlyq taǵamdaryn usynyp, aspazdyq sheberlikterin kórsetýde. Atap aıtqanda, belgııalyq aspaz Jan Ashner «mıdıı po-belgııskı» taǵamyn, shveısarııalyq Tomas Mıýller irimshik negizindegi fırmalyq asyn usynýda. Sonymen qatar, reseılik Evgenıı Chekanın, ázerbaıjandyq Emıl Alıev, fransııalyq Nıkolıa Lezıor, túrkııalyq Abbas Ishık, grýzııalyq Iosebı Djabanashvılı, qyrǵyzstandyq Berık Egınbaev, ózbekstandyq Ahmad Hamdamov jáne serbııalyq Danıela Pantıch óz taǵamdaryn kópshilik nazaryna usynýda.
Festıval aıasynda birneshe nomınasııa boıynsha gastronomııalyq baıqaýlar uıymdastyrylǵan. Qatysýshylar «úzdik káýap», «úzdik palaý», «úzdik samsa» jáne «úzdik ulttyq taǵam» atalymdary boıynsha baq synaýda.
Sonymen qatar, festıvalge shamamen 50-ge jýyq jergilikti meıramhana qatysyp, kelýshilerge san túrli taǵamdar usynýda. Olardyń qatarynda Grand Praga, BOZJYRA, Calista, Barvilla, Mimino, Mozzarella by Meyram Group, Afsona, Kóksaraı, Dushevnaya Kukhnya, STEAKFIELD, Madlen, Istanbul, Kamshat, Kausar jáne Jeti Tandir bar.
Festıval tek gastronomııalyq baǵytpen shektelmeı, keń aýqymdy mádenı-oıyn-saýyq baǵdarlamasymen tolyqtyrylǵan. Kelýshiler úshin street style jáne K-pop baǵyttaryndaǵy bı saıystary, dombyrashylar ansambliniń óneri, batyrlar shoýy, sırk qoıylymdary, motosherý men avtokólikter kórmesi uıymdastyrylýda.
Is-shara birneshe taqyryptyq aımaqqa bólingen. Etnoaımaqta halyqaralyq aspazdardyń sheberlik sabaqtary men ulttyq taǵamdar baıqaýy ótse, eýropalyq aımaqta zamanaýı shoý-baǵdarlamalar usynylýda. Al Arbat aımaǵynda qolónershiler jármeńkesi uıymdastyrylyp, ulttyq buıymdar kópshilik nazaryna usynylǵan.
Festıvaldiń resmı ashylýy saltanatty túrde ótip, keshki ýaqytta jeńimpazdardy marapattaý rásimi men konserttik baǵdarlama josparlanǵan.
Aıta keteıik, «DamDastour» halyqaralyq gastronomııalyq festıvali – tek taǵam merekesi ǵana emes, halyqtar mádenıeti men dástúrin toǵystyratyn, Naýryzdyń shynaıy rýhyn aıshyqtaıtyn jáne qoǵamdy biriktiretin aýqymdy mádenı alańǵa aınalyp otyr
