Dári-dármekti sıfrlyq tańbalaýdyń negizgi sebebi – kontrafaktiniń etek alýy, dárilik zattardyń elge zańsyz tasymaldanýy. Mundaı jaǵdaıdyń kóp bolýy halyqtyń densaýlyǵyna tikeleı qaýip tóndiredi. Sondaı-aq dárilik zattardy sıfrlyq tańbalaý árbir dáriniń qozǵalysyn onlaın baqylaýǵa, suranysty baǵalaýǵa jáne qajetti rezervterdi qalyptastyrýǵa múmkindik beredi.
Dárilik zattardy sıfrlyq tańbalaý júıesi árbir dáriniń zattyń qaptamasynda ónim túpnusqalyǵyn tekserýge bolatyn biregeı «data matrix» sıfrlyq kodtaryn paıdalanýdy kózdeıdi. Ony skanerler, derekterdi jınaý termınaldary, POS-termınaldar jáne telefon kameralary arqyly skanerleýge bolady.
– Kásiporyndarda sıfrlyq tańbalaý kezinde másele týyndasa, biz tehnıkalyq jaǵynan kómek kórsetýge daıynbyz. Birden aıyppul salyp, kásipkerlerge qysym kórsetpeımiz. Basynda túsindirý jumystary júrgiziledi. Máselen, azamattar qoldanatyn dári-dármektiń 85 paıyzy elimizde óndiriledi. Iаǵnı óndiris ornynda, taýardy birden sıfrlyq tańbalaý qajet bolady. Jańa zańdy eskermegender jaýapkershilikke tartylady, – deıdi Farmasevtıkalyq qyzmetti baqylaý basqarmasynyń basshysy Erik Qulshanov.
Dárilik zattardy tańbalaý jáne qadaǵalaý júıesinde jumys isteý úshin dárihanalar aqparattyq júıede dárilik zattardy qabyldaýy qajet. Ol úshin jeke kompıýter, derekterdi jınaý termınaly nemese uıaly telefon («iOS» nemese «Android» negizindegi smartfon) bolsa jetkilikti. Kóptegen qadaǵalaý fýnsııasy da bar. Odan basqa tegin «Naqty Onim» qosymshasy tutynýshylarǵa ónimniń dárihana sórelerine deıin tolyq jolyn, satyp alynǵan dáriniń Densaýlyq saqtaý mınıstrligi belgilegen shekti ruqsat etilgen baǵaǵa sáıkes keletinin aıtyp beredi. Eger tańbalaý kodyn skanerlegennen keıin satyp alýshy dáriniń jaramdylyq merzimi ótip ketkenin nemese dári-dármektiń quny ruqsat etilgen baǵasynan joǵary ekenin anyqtasa, onda ol shaǵymdy qosymshada qaldyra alady.
