Erbol Shaımerdenovtiń 70 jyldyǵyn jerlesteri S.Muqanov atyndaǵy oblystyq ǵylymı-ámbebap kitaphanasynda mamyr aıynda atap ótken. Dál sol ýaqytta aqynnyń mereıtoıy Astana qalasynda úlken memlekettik shara retinde atalyp, týǵan jerine qalamdas dostary men zııaly qaýym ókilderi kele almaǵan edi. Osy olqylyqtyń ornyn toltyrý maqsatynda ótken aptada senator Nurtóre Júsip bastaǵan bir top qoǵam qaıratkeri, aqyn-jazýshylar Qyzyljar óńirine, aqynnyń týǵan jerine keldi. Delegasııa quramynda kórnekti jazýshy Qýanysh Jıenbaı, fılologııa ǵylymdarynyń doktory, aqynnyń dosy, fılologııa ǵylymdarynyń doktory, professor Qudaıbergen Tursyn, qalamgerdiń jary Kúlásh Shaımerdenova, áýesqoı kompozıtor Qudııarbek Aǵybaev, aıtysker aqyn Raýan Qaıdar jáne Erekeńniń bir top týysy boldy.
Osy toptyń qatysýymen S.Muqanov atyndaǵy oblystyq ǵylymı-ámbebap kitaphanasynyń úlken zalynda zııaly qaýym ókilderiniń kezdesýi uıymdastyryldy. Ony oblystyq mádenıet basqarmasynyń basshysy Sanat Áýbákirov ashyp, qonaqtardy oblys ákimi Ǵaýez Nurmuhambetov atynan quttyqtap, sát-sapar tiledi. Qonaqtar arasynan sóılegen jazýshy Qýanysh Jıenbaı Erekeńniń adamgershilik qyrlaryna toqtaldy. QazMÝ-da birge oqyǵanyn, Erjuman Smaıyl, Súleımen Mámet syndy tulǵalarmen dostyq qarym-qatynastaryn eske aldy. «Erbol bizden jas bolsa da, salmaqty oıymen, parasatty minezimen naǵyz syrbaz edi. Ol jastaıynan kózge túsip, ádebıette de Á.Nurpeıisov sııaqty tym talǵampaz korıfeılerdiń ózin erte moıyndatty», dedi. Senator Nurtóre Júsip búgingideı almaǵaıyp zamanda Erbol aǵadaı kemeńger adamdar bolsa, elimizdiń erteńine jaýap izdep, strategııalyq maqsattarymyzdy aıqyndaýǵa belsene qatysar edi dep onyń ómirden beımezgil ótkenin ókinishpen aýyzǵa aldy. Aqynnyń adamgershilik qyrlaryna toqtalyp, qamqorlyǵyn kórgenin jetkizdi. Jasandy ıntellekt qaryshtap damyp kele jatqan búginde Erbol Shaımerdenovtiń jınaǵan danalyqtary, ásirese qazaq aforızmderi kompıýter baǵdarlamalaryna túgel engenin qalaıtynyn aıtty. Sonymen birge Erbol Shaımerdenov táýelsizdiktiń eleń-alańynda Almatyda jazylǵan «Bez pravyh ı levyh» degen kitaptyń tusaýkeserin Máskeýde uıymdastyrǵanyn eske aldy. «Sondaı tamasha uıymdastyrylǵan tusaýkeserdi óz basym sodan beri kórgenim joq», dep aqtaryldy N.Júsip.
Aqynnyń kýrstas dostarynyń biri Qudaıbergen Tursyn Erbol Shaımerdenovtiń stýdenttik jyldarda birden kózge túsip, Erjuman Smaıylmen qatar belgili tulǵaǵa aınalǵanyn aıtty. «Ekeýi de bizdiń kýrsymyzdyń aqyly men sabyry, barlyq jaqsy istiń uıytqysy bolǵan edi», dedi ol. Qudııarbek Aǵybaev ózi kásipqoı kompozıtor bolmasa da, E.Shaımerdenovtiń birneshe óleńine án shyǵarǵanyn qosty. «Onyń baıypty jyrlary ánge suranyp turatyn. Týǵan qalasy týraly «Gorod moı rodnoı» degen óleńine oryssha da án shyǵardym. Artynan qazaqsha «Qyzyljarym» degen án de ómirge keldi», dedi ol.
Belgili aıtysker aqyn Raýan Qaıdar osy keshke arnaǵan tolǵaýyn oryndap berdi. Al jergilikti zııaly qaýym ókilderi arasynan jýrnalıst Jarasbaı Súleımenov pen ǵalym Zarqyn Taıshybaı ózderiniń Erbol Shaımerdenov týraly oılaryn ortaǵa saldy. Aqynnyń jary Kúlásh jeńgemiz jyr keshine qatysqan jandarǵa alǵys aıtty.
Kelesi kúni astanalyq qonaqtar aqynnyń týǵan aýyly Jańajoldaǵy Sábeń kitaphanasynda taǵy bir tamasha jyr keshine qatysty. Ol artyna birneshe jyr jınaǵyn qaldyrǵan, Sattar Seıitqazın, Saǵat Áshimbaev, Tumanbaı Moldaǵalıev syndy aqyn-jazýshylarmen jaqyn aralasqan jýrnalıst Toqtar Zikirınniń 75 jyldyq mereıtoıy edi. Osydan eki jyl buryn qaterli indet ómirin úzip ketken Toqań sezimdi jyrlarymen respýblıkaǵa birshama tanymal boldy. «Dám-tuzym taýsylǵansha tatyp jegen, Adam bop qalýdy men maqul kórem. О́tkizemin ár sózdi oı-elekten, Jazylyp jatqandaıyn aqyrǵy óleń», dep jyrlaǵan áleýmettik lırıkanyń sheberi Toqtar Zikirınniń óleńderinen sezimdi selt etkizetin órnekti jyrlardy kóp tabýǵa bolady.
Ákesiz ósken Toqań Qaraǵandynyń kooperatıv ınstıtýtyn bitirip, uzaq jyl óz mamandyǵy boıynsha qyzmet atqarǵan. Biraq aqyn júrek ádemi jyrǵa elegizip, aqyry ony qalamgerlikke ákeledi. Aldymen oblystyq «Soltústik Qazaqstan» gazetiniń Shal aqyn, Tımırıazev aýdandaryndaǵy arnaýly tilshisi retinde eńbek etip, ótken ǵasyrdyń 90-jyldarynan Petropavl qalasyna ornyǵyp, zeınetke shyqqansha oblystyq gazettiń bedeldi jýrnalısteriniń biri boldy. Bala minezdi Toqtar Zikirın jas-kárige birdeı jaǵyp, salmaqty, sabyrly, baısaldy minezinen aınymaǵan. Bul týraly jyr keshinde sóılegen jandardyń bári de júrekterinen aqtaryldy. Sonyń ishinde qurdasy, bala kezden birge ósken dosy Jarasbaı Súleımenov, áriptesteri Nursaıyn Shárip, Názıra Qurmankına, Qoshan Qalı, aqyndar Dásten Baımuqanov, Maral Ospanova, taǵy basqalar aıtty.
