Foto: primeminister.kz
Ekibastuz qalasynda vıse-premer «Samǵaý» balalar shyǵarmashylyq úıiniń qurylys barysymen tanysty. Joba Memleket basshysynyń tapsyrmasymen salynyp jatyr. Byltyr qazan aıynda bıýdjetten tys qarajattar esebinen bastalǵan qurylys qazirgi ýaqytta aıaqtalýǵa jaqyn qaldy.
Zamanaýı qural-jabdyqtarmen qamtylǵan bilim berý kesheninde 12 baǵyt boıynsha úıirmeler men seksııalar uıymdastyrylady. Inklıýzıvtilikke erekshe nazar aýdarylǵan – nysan erekshe qajettiligi bar balalarǵa tolyǵymen beıimdelgen, sondaı-aq ata-analardy psıhologııalyq-pedagogıkalyq qoldaý ortalyǵy da jumys istemek. Ortalyq qala balalaryn mektepten tys is-sharalarmen 32%-dan 70%-ǵa deıin qamtýǵa múmkindik beredi. Tamara Dúısenova nysannyń mańyzdylyǵyn atap ótip, qurylys jumystaryn belgilengen merzimde aıaqtaýdy tapsyrdy.
Pavlodarda Tamara Dúısenova «Viamedis Pavlodar» JShS emhanasyna bardy. Qalanyń №4 emhanasy MJÁ jobasy aıasynda jeke kompanııaǵa senimgerlik basqarýǵa berilgen bolatyn. Bul onyń kadrlyq áleýetin keńeıtýge jáne nyǵaıtýǵa, sondaı-aq ınfraqurylymyn túbegeıli jaqsartýǵa múmkindik berdi. Nysan KT, MRT, basqa da zamanaýı medısınalyq qondyrǵylarmen jabdyqtalǵan.
Jumys sapary barysynda oblys ákimi Asaıyn Baıhanovpen birge óńirdegi medısına uıymdary basshylarymen keńes ótkizildi. Onda medısınalyq qyzmet sapasyn jaqsartý, jańa tehnologııalardy engizý, onyń ishinde dári-dármekti tańbalaý men qadaǵalaýdy engizý máseleleri talqylandy. Qazir óńirlerge 11 myńǵa jýyq tańbalanǵan preparat jiberildi. Onyń 600-i óńirdiń dárihanalar jelisine jetkizildi.
Densaýlyq saqtaý vıse-mınıstri Erjan Nurlybaev densaýlyq saqtaý júıesiniń jaǵdaıy, saladaǵy qyzmet kórsetý sapasyn jaqsartý jáne halyqty qamtýdy ulǵaıtý boıynsha júrgizilip jatqan jumystar týraly baıandady.
Búgingi tańda oblysta 117 myńnan astam adam saqtandyrylmaǵan. MÁMS júıesine azamattardy tartý úshin mekenjaı boıynsha jumys júrgizý mindeti qoıyldy.
«Azamattardyń mártebesin anyqtaý mańyzdy. Júıege tartylmaǵandardyń arasynda memleket esebinen aýdarym júrgiziletin adamdar sanaty bolýy múmkin. Al eńbekke qabiletti azamattardy jumyspen qamtý boıynsha sharalar qabyldanýy tıis. Dárilik zattardy tańbalaý jáne qadaǵalaý úderisi kontrafaktilik ónimderdi aınalymnan shyǵarýǵa baǵyttalǵan. Halyq sapaly ári sertıfıkattalǵan dári-dármekterdi qoldanatynyna senimdi bolýy kerek», dep atap ótti Tamara Dúısenova.
Jumys sapary barysynda vıse-premer Malaısary batyr atyndaǵy orta mektepke bardy. Munda ol oqýshylardyń qaýipsizdigin qamtamasyz etý, mektep ashanalaryndaǵy tólem júıesin sıfrlandyrý, sondaı-aq oqýshylarǵa kásiptik baǵdar berý boıynsha jumystarmen tanysty.
Tamara Dúısenova oblystyń bilim uıymdary basshylarymen jınalys ótkizdi. Onda sapany arttyrý máseleleri talqylandy. Qazir oblysta 359 mektep jumys isteıdi. Jobalyq keńse qurylyp, birinshi kezeńde 14 maqsatty bilim mekemesinde bilim sapasyn kóterý úshin ádistemelik sharalar qabyldana bastady.
Vıse-premer Pavlodar oblysy bilim sapasy boıynsha elimizde kósh bastap turǵanyn atap ótip, bilim berýdi tulǵany damytýdyń kópdeńgeıli júıesi retinde qarastyra otyryp, nátıjelerdi ári qaraı jaqsartý qajet ekenin atap ótti.
«Pavlodar oblysy – bilim sapasy boıynsha qazir elimizdegi úzdik bestiktiń qatarynda. Jaqsy kórsetkishterdi saqtap qana qoımaı, joǵarylatýǵa da umtylý mańyzdy. Maqsatty mektepterdi anyqtaý qajetti sharalardy qabyldaýǵa múmkindik beredi. Balabaqsha, mektep, kolledj, JOO jeke tulǵany damytýdyń dáıekti ári ózara baılanysty jáne kópdeńgeıli júıesi retinde qarastyrylýǵa tıis», dep atap ótti T.Dúısenova.
