Sport salasyna aýqymdy reforma kerek

Tórtjyldyq dodasynyń qorytyndysy aıtylyp, keleshekke jospar túzilip, jaýapty uıym basshylaryna aýqymdy sharýanyń jaýapkershiligi júkteldi. Parıj Olımpıadasyndaǵy nátıje saralanyp, sport salasyna aýqymdy reforma júrgizý qajettigi talqylandy.

«Bizdiń sportshylar Olımpıadaǵa 25 sport túrinen qatysty. Sonyń beseýinen medal aldy (altyn – dzıýdo, kúmis – boks, sporttyq gımnastıka, grek-rım kúresi, qola – dzıýdo, boks, nysana kózdeý). Jalpy, 87 memleket Parıjde júldege ıe boldy. Qazaqstan komandalyq esepte 43-orynǵa turaqtady (1 altyn, 3 kúmis jáne 3 qola medal). Eldos Smetov dzıýdo kúresinen Qazaqstan balýandary arasynan alǵash bolyp Olımpıada chempıony atandy. Narıman Qurbanov tarıhı medal jeńip aldy. Ol – el tarıhynda sporttyq gımnastıkadan júlde alǵan tuńǵysh sportshy. Nysana kózdeýden Islam Sátpaev pen Aleksandra Le qola júlde enshiledi. Bul sport túrinen 1996 jylǵy Atlanta (AQSh) Olımpıadasynan keıin alǵash ret medal aldyq», dedi Týrızm jáne sport mınıstri Ermek Marjyqpaev.

Parıj Olım­pıadasy­nan medal oljalaǵan sańlaqtarmen kezdesýde Prezıdent Qasym-Jomart Toqaevtyń qashanda sportqa júıeli qoldaý kórsetip, jan-jaqty damytýǵa múmkindik týǵy­zyp otyrǵanyna toqtal­ǵan mınıstr memleket qam­qor­­lyǵynyń qaıtarymy bolýy kerek ekenin basa aıtty.

«Jekelegen sport túrleri boıynsha nátıjeni jaqsartý kerek. Biz úshin dástúrli sanalatyn sport túrleri bar. Solardan daıyndyq kóńil kónshitpeı, nátıje nashar bolyp shyqty. Byltyr Qytaıdyń Hanchjoý qalasynda Azııa oıyndary ótti. Azıadaǵa qatysqan sportshylardyń 80 pa­ıyzy bıyl Parıjge bardy. Al Hanchjoýda ulttyq quramanyń qandaı nátıje­ kórsetkeni bárimizge belgili. Tarıhtaǵy eń sátsiz Azıada boldy. Soǵan qaramastan az ýaqyt qalsa da, barlyǵyna jaǵdaı jasadyq. Biraq Parıj­degi kórsetkish kóńil­den shyqqan joq» degen E.Marjyqpaev alamanǵa attanarda aıtylǵan ýáde­niń oryn­dalmaǵanyna qynjylys bildirdi.

Mınıstr Parıjden jalqy júldemen oralǵan boksshylardyń nátıjesine kóńili soqpaıtynyn, júıeli jumys júrgizý úshin túbegeıli reforma qajettigin eskertti. Jeńil atletıka boıynsha da ýáde oryndalǵan joq. 8 joldama enshilegen jeńil atletter 1 kúmis medal oljalaımyz dep sendirgenimen, eń táýir kórsetkish 9-oryn boldy. 2000-2020 jyldar aralyǵyndaǵy jazǵy Olımpııa oıyndarynan medalmen oralǵan jeńil atletterdiń de jat­tyǵý júıesine aýqym­dy ózgeris engizip, júk­temeni kúsheıtý kezek kúttir­meıtin sharýa ekenin jet­kizdi. E.Marjyqpaev mindet­temelerge sáıkes erkin kúres komandasy qola medal alýǵa ýáde bergenin atap ótti. Alaıda sportshylar shırek fınalǵa óte almaı, birin­shi aınalymnan shyǵyp qaldy. Tipti eń sátsiz degen Tokıo Olımpıadasynda erkin kúresten qola medal buıyr­ǵan edi. Bul joly 4 bal­ýanymyzǵa joldama tıip, Olımpıadaǵa joly túskenimen Parıj kilemi sportshylardyń daıyndyǵy qandaı mejede bolǵanyn áıgi­lep berdi. «Tarıhta alǵash ret áıelder kúresinen sport­shylar oıyndarǵa qatys­qan joq. Buǵan deıin balýan qyzdarymyz júlde­men oralyp edi», dedi mınıstr.

Sala basshysy aımaq­tardyń jaǵdaıyna toqtalyp, ulttyq quramaǵa 17 óńirdiń sportshylary engenin aıtty. Almaty (17 lısenzııa), Astana (14) jáne Shymkent (12) ókilderi kóp joldama enshilegen. Al Qostanaı, Ulytaý jáne Mańǵystaý oblystarynyń sportshylary birde-bir lısenzııa alǵan joq. Júldege tek Jambyl oblysy (altyn – E.Smetov), Almaty qalasy (kúmis – N.Qurbanov, 3 qola: Ǵ.Qyrǵyzbaev, N.Qyzaıbaı, I. Sátpaev jáne A.Le), Astana qalasy (kúmis – N.Oralbaı), Almaty oblysynyń (kúmis – D.Jadyraev) sańlaqtary qol jetkizdi. Sporttyq tarıhy baı, talaı sańlaq­ty túletken Qaraǵandy oblysynyń sportshylary osymen ekinshi Olımpııa oıyndarynan medalsyz qaıtyp otyr. Mınıstr buǵan deıin 2 altyn, 1 kúmis, 3 qola medal enshilegen óńirdiń sporty eńsesin tikteı almaı turǵanyn synǵa aldy. Pav­­lodar oblysynda da jyl­­dan-jylǵa kórsetkish kúrt tómendep barady. 2016 jy­ly ótken Rıo Olım­pıadasyna bul oblys­tyń úzdikteri 7 joldama ıelense, 2021 jyly ótken Tokıo dodasynda 4, al bıyl Parıj­ge tek 1 sportshy ǵana qatysty.

E.Marjyqpaev jergi­likti atqarýshy organdar olımpıadalyq sport túrlerine basymdyq berip, salany damytý saıasatyn qaıta qaraýy qajet eke­nin aıtty. «Qazirden bastap múddeli taraptarmen birge aqparattyq-túsin­dirý jumystaryn júr­gizý kerek. Alty aıdan keıin Har­bınde IH qysqy Azııa oıyn­dary ótedi. Mılan men Kor­tına-dAmpesso qala­larynda ótetin HHV qysqy Olımpıada dodasyna da az ýaqyt qaldy. Ulttyq qura­manyń daıyndyǵyn kúsheıtý qajet», dedi mınıstr.

Parıj Olımpıadasynyń qorytyndysyna arnalǵan alqa otyrysynda E.Mar­jyqpaev qolǵa alǵan sharalar aldaǵy ýaqytta jemisin beretinine senim bildirdi. «Sportty óristetip, sportshylardyń alańsyz daıyndyq jasaýyna múmkindik týǵyzyp, kem-ketikti bútindeýimiz kerek. Biz jańa Olımpıadalyq sıkldi qazirden bastadyq. Alda Los-Andjeles Olımpıadasy kútip tur. Mańyzdy dodaǵa qazirden daıyndalý kerek. Mınıstrlik, federasııalar, bapkerler, ákimdikter, Ulttyq Olımpıada komıteti Parıjdegi jaǵdaıdan sabaq alyp, sapaly jumys júrgizýi qajet. Bul – bárimizge ortaq mindet», dedi mınıstr.