Qazaqstannyń eńbek sińirgen ártisine bul marapat Konstıtýsııa kúnine arnalǵan "Aıbary myqty - Ata Zań" is-sharasynda tabystaldy.
Saltanatty jıynǵa oblys ákimi Darhan Satybaldy arnaıy qatysyp, óńirdiń jetistikteri týraly baıandama jasady. Sonymen qatar turǵyndardy merekemen quttyqtady.
– Sizderdi elimizdiń mańyzdy merekesi – Konstıtýsııa kúnimen quttyqtaımyn! Bul mereke – derbestigimiz ben daralyǵymyzdyń aıǵaǵy, eldigimiz ben erligimizdiń baıraǵy. Memlekettigimizdiń keshegisi men kelesheginiń kepili. Memleket basshysy Qasym-Jomart Toqaevtyń tikeleı qoldaýymen óńirde aýqymdy jobalar qolǵa alyndy. Osy mańyzdy isterdi atqarýǵa úles qosyp júrgen barshańyzǵa alǵysymdy bildiremin. Oblys turǵyndarynyń 80 paıyzy aýyldy eldi mekenderde turady jáne aýyldy jerlerdi qajetti ınfraqurylymmen qamtý – basty baǵytymyzdyń biri. Elimiz budan ári damýy úshin árbir azamat Ata zańymyzdyń ustanymyn qatań saqtaı otyryp, eńbek ete bilýi tıis. Bul rette, «Eńbek adamy» beınesin nasıhattaý bolashaq urpaq úshin taptyrmas úlgi bolary haq. Ata zańdy ardaq tutqan ónegeli elimiz órkendeı bersin! – dedi oblys ákimi.
Aıta keteıik, «Kongress holl» kópsalaly kesheninde ótken is-sharada óńir basshysy birqatar azamattardy marapattady. «Qurmet» jáne III dárejeli «Eńbek Dańqy» ordeni, «Eren eńbegi úshin» medali syndy memlekettik nagradalaryn tabystady.
Sonymen qatar oblystyń Qurmetti azamaty ataǵyn tapsyrdy. Onyń ishinde qoǵam qaıratkeri, Túrkistan oblysynyń burynǵy ákimi О́mirzaq Shókeev, Qazaqstan musylmandary dinı basqarmasynyń tuńǵysh tóraǵasy, qurmetti mýftı Rátbek qajy jáne memlekettik jáne qoǵamdyq qyzmette eńbek sińirgen, óńirdiń áleýmettik-ekonomıkalyq damýyna eleýli úles qosqan azamattar bar.
Saltanatty jıyn ári qaraı konserttik baǵdarlamaǵa ulasty.
