«Bala turkvizyon – Qazaqstan» jobasy О́skemennen bastaý aldy

«Bala Turkvizyon-2015» halyqaralyq balalar áni baıqaýynyń ulttyq irikteýi О́skemen qalasynan bastaý aldy. Baıqaý bastamashysy – Álııa Nazarbaevanyń «Jandaný álemi» qory. Alǵashqy irikteýge Shyǵys Qazaqstan oblysynan 157 ónerpaz qatysty. Metallýrgter mádenıet saraıynda tańerteńnen bastalǵan kezekti Glýbokovskoe (Glýbokoe aýyly), Tarbaǵataı (Aqjar aýyly), Zyrıanovsk (Serebrıansk aýyly), Aıagóz, О́skemen, Rıdder jáne Semeı qalalarynan kelgen jas talanttar toltyrdy. О́skenmen qalasynan ulttyq irikteýdiń jartylaı fınalyna úmitkerdi anyqtaýǵa ánshi Sanda, tanymal prodıýser Erık Tastambekov pen ánshi Ivan Breýsov keldi. Qazylar alqasyna kóp ónerpazdyń ishinen úzdikterdi anyqtaý qıynǵa soqty. Kishkentaı ártister úlken synaqqa daıyn ekendikterin dáleldeı bildi. О́ıtkeni, olardyń kóbisi úlken sahnaǵa birinshi ret qadam jasaýda, kamera aldynda ári óner juldyzdarynyń aldynda óner kórsetý – úlken erlik. Aımaqtyq irikteý kezinde ártúrli janrdaǵy, ártúrli baǵyttaǵy ánder oryndaldy: halyq ánderi, rep, pop jáne avtorlyq ánder. Úmitkerler oryndaǵan ánder qazaq, orys, aǵylshyn, ıtalıan tilderinde boldy. Árbir qatysýshy marapatqa, qurmetke ıe. Olar Álııa Nazarbaevanyń «Jandaný álemi» qorynyń «Bala Turkvizyon» ulttyq irikteýiniń qatysýshysyna arnalǵan sertıfıkat pen ulttyq irikteý ánurany jazylǵan CD-dıskilerge ıe boldy. О́skemen qalasynyń ulttyq irikteý jeńimpazy 12 jastaǵy Rashıda Uzyhanova – Semeı qalasynyń turǵyny. Qazylar alqasynyń sheshimi boıynsha Rashıda Astana qalasynda ótetin fınalda Shyǵys Qazaqstan oblysynyń namysyn qorǵamaq. Buǵan deıin de jas ónerpaz kóptegen respýblıkalyq, halyqarlyq baıqaýlarǵa qatysyp úlgergen. Ulttyq irikteýdiń kelesi kezegi Pavlodar qalasynda. «Egemen-aqparat».