Foto: Ashyq derekkóz
Memleket basshysy Úkimettiń aldynda turǵan mańyzdy mindetti atady.
«2029 jylǵa qaraı orta bıznestiń el ekonomıkasyndaǵy úlesi 15 paıyzǵa jetýi kerek. Bul – Úkimettiń aldynda turǵan mańyzdy mindet. Qazir bul kórsetkish – 7 paıyz shamasynda. Jyl basynda men orta bıznesti qoldaý úshin naqty sheshimder qabyldaý jóninde tapsyrma berdim. Iаǵnı, jan-jaqty sharalar qolǵa alynýy kerek edi. Alaıda is júzinde áli daıyn emes», dedi Prezıdent.
Qasym-Jomart Toqaevtyń aıtýynsha, ár kásipker qoldaýdyń qandaı túri bar ekenin jáne oǵan qalaı qol jetkize alatynyn esh qıyndyqsyz bilip otyrýy qajet. Sonda shaǵyn bıznes orta bıznes sanatyna ótýge múddeli bolady.
«Bizde qazir qoldaý sharalarynyń 100-den astam túri bar. Budan bilikti mamannyń ózi shatasýy múmkin. Sondyqtan memlekettik qoldaý sharalarynyń qanshalyqty tıimdi ekenin muqııat tekserip shyǵý kerek. Usynylatyn jeńildikterdiń bıznes ókilderine túsinikti biryńǵaı tizimin ázirleý qajet. Shaǵyn jáne orta bıznesti damytý úshin fınteh tásilderin paıdalanýǵa bolady, bul másele boıynsha tıisti usynystar bar», dedi Memleket basshysy.
Sonymen qatar, el Prezıdenti Agroónerkásip keshenine ınvestısııa tartýdyń óte mańyzdy mindet ekenin atap ótti.
«Agroónerkásip keshenine ınvestısııa tartý – óte mańyzdy mindet. Tasqyn sýdan bolǵan qıynshylyqtarǵa qaramastan, dıqandarymyz egin egý jumysyn der kezinde aıaqtady. Olarǵa zor rızashylyǵymdy bildiremin. Bıyl egis naýqanyna eki ese kóp qarajat bólindi. Alaıda agroónerkásipke bólinetin búkil aqshanyń 70 paıyzy – memleket qarjysy. Bul salaǵa kommersııalyq bankterdiń qarajatyn da tartý qajet. Dıqandarǵa ósimi az nesıe berý úshin memlekettik qarjy ınstıtýttaryn sýbsıdııalaý sharalary qolǵa alyndy. Bankterge qatysty osyndaı tájirıbeni qoldaný kerek. Munyń bári sharýalardy aınalymǵa qajetti qarajatpen shuǵyl qamtamasyz etýge, sybaılas jemqorlyq qaterin azaıtýǵa jáne nesıe alýdy ońtaılandyrýǵa jol ashady», dedi Memleket basshysy.
