Meıirim shýaǵy

Qostanaıda «Mereıli otbasy» baıqaýynyń «Parasatty otbasy», «Áýlet», «Mereıli otbasy» atalymdary boıynsha óńirlik satysynyń jeńimpazdary anyqtaldy. Osyǵan deıin baıqaý oblys aýdandary men qalalarynda ótken bolatyn. Aýdandyq satydan jeńimpaz atanǵan otbasylar oblystyq deńgeıde baq synasty. «Mereıli otbasy» oblystyq baıqaýynyń jeńimpazdaryn marapattaý saltanatynda oblys ákimi Nuraly Sádýaqasov bylaı dedi: – Otbasy – ár adam ómirindegi eń joǵary qundylyq. Adam boıyndaǵy názik, meıirimdilik sezimderi otbasynda qalyptasady. Baıqaýdyń «Parasatty otbasy» atalymy boıynsha Alma men Súgirbaı Nurmanovtar otbasy jeńimpaz atandy. Arqalyq qalasynda turatyn olar 2 ul, 3 qyz tárbıelep otyr, 4 nemere súıdi. Otbasynda tárbıe adamgershilikke negizdelgen, balalary eńbekpen ósti. Al «Áýlet» atalymy boıynsha Vasılıı men Galına Gortqa qurmet kórsetildi. Bul otbasyn dostary, kórshileri, týystary elektrslesarlar áýleti dep ataıdy. Gorttar otbasy 7 bala tárbıelep ósirdi, olardan 12 nemere súıip otyr. – Árıne, bala ósirý ońaı sharýa emes. Eń bastysy, perzentińdi jaqsy kórý kerek, biraq qatty ustaǵan jón. Biz kúıeýimiz ekeýmiz ýchılısheni birge bitirdik, mamandyǵymyz elektr slesary boldy. Men bala tárbıesimen aınalystym, ákesi jumys istedi. Eki ul ákesiniń izimen keledi. Bir nemerem de elektr slesary mamandyǵyn qalady. Aldymen balalar ákesinen úırenip edi, endi, ol balalarynan úırenedi, – dedi Galına Gort. Baıqaýdyń eń basty atalymy – «Mereıli otbasynyń» jeńimpazy bolyp Nurlan men Gúljaýhar Tólegenovter ataldy. Olar konkýrstyń respýblıkalyq satysynda Qostanaı oblysynyń namysyn qorǵaıtyn bolady. Baqytty jup úlken otbasy bolýdy armandaıtyn. Sóıtip, óz qyzynyń syrtynda taǵy da 8 balany óz qamqorlyǵyna aldy. Qazir 5 qyz, úsh ul ósirip otyr. Gúljaýhar – muǵalim, Nurlan – júrgizýshi bolyp isteıdi. Olardyń balaǵa degen mahabbaty otbasyn nurlandyryp jiberdi. Tólegenovterdi búginde búkil oblys tanıdy. Olarǵa Qostanaı aýdanynyń ortalyǵy Zatobol poselkesinen úı salyp berdi. Onyń alǵashqy irgetasyn qalaýǵa aýdan muǵalimderi bastama kóterip, qarjy jınaǵan bolatyn. Bıyl oblystaǵy barlyq etnomádenı ortalyqtary jınaǵan qarjy úıdiń qurylysyn túgel aıaqtaýǵa múmkindik berdi. Nurlan men Gúljaýhar otbasyndaǵy meıirim men shýaqtyń almaıtyn asýy joq dep biledi. Olar aıalap tárbıelep otyrǵan 9 balasy er jetip, bir-bir shańyraq kóterse, Otanymyzdyń beldi azamattary bolsa, túpkilikti jeńisimiz sol bolady dep armandaıdy. Arman aldamaıdy. Názıra JÁRIMBETOVA, «Egemen Qazaqstan». QOSTANAI.