Foto: Senat
Gennadıı Shıpovskıh «Bankter» týraly jańa zańdy halyq kútkenin atap ótti.
«Búgin QR Parlamenti palatalarynyń birlesken otyrysynda elimizdiń Prezıdenti Qasym-Jomart Toqaevtyń Qazaqstan halqyna Joldaýy jarııalandy. Joldaý barysynda memleketimizdiń damýyna qatysty óte myqty usynystar jáne tetikter aıtyldy. Birinshiden, elimizge «Bankter» týraly jańa zańnyń qajettiligi. Meniń oıymsha bul másele el azamattary úshin jaýyr boldy. Ekinshiden, týrısttik klasterdi damytý úshin jaqsy ınfraqurylym ázirleý. Shyn máninde, bul aıtylǵan másele óte oryndy. Bizdiń azamattar nemese syrttan kelgen qonaqtar týrısttik aımaqqa demalýǵa shyqqan kezde, jolmen alyspaı, ábirjimeı, demalystyn ne ekenin seziný kerek! Úshinshiden, bolashaqta tehnıkalyq mamandyqtarǵa baılanysty jas mamandardy daıarlaý. Bul boıynsha bizdiń júıede úlken kemshilik bar. Bolashaqta osy dúnıe boıynsha elimizde maman defısıtin boldyrmaý úshin, biz qazirden myqty tehnologtar men ınjenerlerdi daıarlaýymyz kerek», dedi senator.
Sondaı-aq ol elimizde aldaǵy 2025 jyldy «Jumysshy mamandyqtar jyly» dep jarııalaý qatardaǵy jumysshylardyń adal eńbegin dáripteýge zor yqpal etetinin aıtty.
«Tórtinshi qýanyshty jańalyq - kelesi jyldy «Jumysshy mamandyqtar jyly» dep jarııalaý. Bul eńbek adamy úshin óte mańyzdy. Biz jumysshy mamandyqtardy qurmettep qana qoımaı, odan bólek dáripteýimiz de kerek dep oılaımyn. Jalpy joldaýda elimizdiń damýyna qatysty óte kóp mańyzdy máseleler qozǵaldy. Endi aldaǵy ýaqytta osynyń barlyǵy iske asyp jatsa, el ıgiligi úshin jasalar jaqsylyqtar kóp bolady», dedi Gennadıı Shıpovskıh.
