Keń óris

Astanada «Nur Otan» partııasynyń Qoǵamdyq saıasat ıns­tıtýty «SarapTime» carapshylar klýbymen birlesip, «Ult jospary – «Memleket qurylysynyń odan arǵy damýynyń 100 naqty qadamyn iske asyrýdyń qoǵamdyq tetikteri» degen taqyryptaǵy ekinshi otyrysyn ótkizdi. Basqosýǵa «Nur Otan» partııa­sy Qoǵamdyq saıasat ınstıtýty­nyń dırektory Saıasat Nurbek, «Alternatıva» ózekti zertteýler ortalyǵynyń dırektory, saıasattanýshy Andreı Chebotarev, «Abaı-aqparat» qoǵamdyq qorynyń vıse-prezıdenti Aıdos Sarym, Makroekonomıkalyq zertteýler ortalyǵynyń dırektory Oljas Qudaıbergenov, «Strategııa» qoǵamdyq qorynyń prezıdenti Gúlmıra Eleýova, saıasattanýshy Erlan Saıyrov jáne taǵy basqalar qatysty. Qazaqstan Azamattyq alıansynyń tóraǵasy Nurlan Erimbetov otyrystyń moderatory boldy. Memleket basshysy Nur­sul­tan Nazarbaev usynǵan bes ınstıtýttyq reformany júzege asyrý maqsatynda belgilen­gen «100 naqty qadam» – Ult josparynda qarastyrylǵan ortasha taptyń úlesin arttyrý, biryńǵaı ishki naryqty damytý, sybaılas jemqorlyqpen kúres, jańa jumys oryndaryn qurý jáne birlikti nyǵaıtý máseleleri sóz etilgen bul jıynda sarapshylar el aldyna qoıylyp otyrǵan osy aýqymdy mindetterdi atqarý isine qatysty oılaryn jetkizdi. Birinshi kezekte sóz alǵan «Nur Otan» partııasy Qoǵamdyq saıasat ınstıtýtynyń dırektory Saıasat Nurbek qazirgi tańda el aldynda mańyzdy mindetter turǵanyn, olardy eńserýde «100 naqty qadam» – Ult josparynyń mańyzdylyǵyna toqtaldy. Onyń aıtýynsha, bes ınstıtýttyq reformanyń óz deńgeıinde júzege asyrylýy elimizdiń jańa beles­ke kóterilýine tolyq múmkindik beredi. Prezıdent Nursultan Nazarbaev óziniń bes ınstıtýttyq reformasynda atap kórsetkendeı, memlekettik organdardyń mól­dir­ligi men eseptiligin, zańdar ústemdiginiń kúsheıtilýin, ekono­mıkalyq ósimdi qamtamasyz etý, el birligin nyǵaıta túsý Qazaq­stannyń búgingi jetistigin odan ári ulǵaıtýǵa kepil bola alady, dedi ol. Budan bólek, Saıasat Nur­bek búginde halyqaralyq sarap­shylardyń Qazaqstanda álemdegi óte joǵary maqsatty kózdegen baǵdarlamalardyń biri bastaý aldy dep esepteıtinin jetkizdi. «Nur Otan» partııasy Qoǵamdyq saıasat ınstıtýty dırektorynyń sózine qaraǵanda, elimizdiń meılinshe joǵary nátıjege qol jetkizýi úshin azamattyq qoǵam men memlekettiń ynta-jigerin jumyldyrýdyń mańyzy zor. Sonymen qatar, ol «100 naqty qadam» bes ıns­tı­týttyq reformany júzege asy­rýdyń naqty algorıtmi ekenin, osy basymdyqtarǵa baılanysty «Nur Otan» partııasynyń 50 usynys ázirlegenin atap ótti. Al Makroekonomıkalyq zertteýler ortalyǵynyń dırektory Oljas Qudaıbergenov halyqaralyq qarjy ınstıtýttary ekonomıkalyq problemalary sheshimin tapqan, saıası turaqtylyq ornyqqan eldermen birge jumys isteýge múddeli ekenin aıta otyryp, Qazaqstanda sheteldikterge kúmán týdyratyn jaǵdaıattar, keleńsizdikter joq ekenine toqtaldy. Jıyn barysynda sarapshylar Ult jospary talaptaryn oryndaýda tıimdi qoǵamdyq tetikter birinshi kezekte azamattardyń ál-aýqatyn, memleket damýyn odan ári óristetýge baǵyttalǵan kúrdeli ınstıtýttyq ózgeristerdiń bas­taýshysy retinde halyqtyń bılik­ke senimin kúsheıte túsetinine de nazar aýdardy. Sonymen qatar, sarapshylar otyrysta memlekettik qyz­met­kerlerdiń kásibıligin túbegeıli arttyrýǵa, sot júıesi men quqyq qorǵaý organdarynyń jumy­syn modernızasııalaýǵa, el tutasty­ǵyn nyǵaıtýǵa, «Ashyq Úkimet» ju­mysynyń meha­nızmde­rin je­tildirýge, memle­kettik appa­rattyń móldirligine, eseptiligine, qoǵamdyq baqylaýdy kúsheıtýge jáne basqa da jaǵ­daılarǵa qatys­ty oılaryn ortaǵa saldy. Jalpy, jıynǵa qatysýshy­lar Prezıdent Nursultan Nazar­baev usynǵan bes ınstıtýttyq reformanyń artyqshylyqtaryn taldaı kelip, onda kórsetilgen bastamalardyń barlyǵy zaman talabynan týyndap otyr degen pikirge keldi. Joldybaı BAZAR, «Egemen Qazaqstan».