Sýretterdi túsirgen – avtor
600 oryndyq jańa mektep eki aýysymda 1200 oqýshyǵa bilim berýge áleýetti. Úsh qabatty bilim ordasynyń lentasy qıylǵan soń oqýshylar men ata-analar, arnaıy shaqyrylǵan qonaqtar sport zalǵa ótip, saltanatty jıynǵa qatysty. Ánuran shyrqaldy, bata berildi, kópshiliktiń aq tilegi aqtaryldy.
– Qalamyzda jańa shaǵyn aýdandar salynyp, ınfraqurylym zamanǵa saı jasalyp jatyr. Mine, jańa mektep ashyldy. Memleket tarapynan oqýshylardyń bilim alýyna jalpy jaǵdaı jasaldy. Jyl sońyna deıin Zaısan aýdany men Jańa Buqtyrma kentinde taǵy eki mektep ashylady. Sondaı-aq jeti birdeı «Jaıly mektep» qurylysy qarqyn alady. Munyń bári el erteńi úshin istelip jatyr, – dedi oblys ákiminiń orynbasary Erbol Nurǵalıev.
Resmı jıynnan keıin jańa mektepke qutty bolsyn aıtyp kelgen qonaqtar bilim oshaǵyn aralap, zamanaýı jabdyqtalǵan kabınetterdi kórdi. Birinshi qabattyń ózinde ınklıýzıvti bilim berýge arnalǵan kabınet, úsh sheberhana, radıo ortalyq, sensorlyq bólme, sport zal, sondaı-aq bes birdeı oqý kabıneti ornalasqan. Mekteptiń ákimshilik qyzmetkerleri de birinshi qabatta otyrady. Al ekinshi qabatta muraǵat, kitaphana, robottehnıka kabıneti, zerthanasy jáne 16 oqý kabıneti bar. Muǵalimder bólmesi men akt zaly da osy qabatta. Zerthanalyq jumystarǵa arnalǵan úsh kabınet úshinshi qabattan qarastyrylǵan. Barlyǵy 32 oqý kabıneti, 4 zerthana, 3 sheberhana bar. Munda 8 – bastaýysh synyp, 10 – orta býyn, 4 – joǵary býyn jáne ekeýi mektepaldy daıarlyq synybynda bilim alady. Aıta keteıik, barlyq kabınet jıhazben, 28 paneldi taqtamen jáne kópfýnksıonaldy prıntermen jabdyqtalǵan. Balasy zaman talabyna saı mektepte bilim alatyn qaı ata-ana bolsyn, shyn qýanyshty shyǵar.
– Shynymdy aıtaıyn, alǵashynda bul mektep aralas bolyp keter me eken degen úreı boldy. Qazaq kóp shoǵyrlanǵan aýdanǵa aralas mekteptiń qajeti qansha dep aryz-armanymyzdy jýrnalısterge san márte aıttyq. Másele kóterildi. Basshylyqqa jetti. Armanymyz oryndalyp, bala-shaǵamyz jańa, jaıly mekteptiń tabaldyryǵyn attady. Memleket olarǵa bilim alýǵa búgin jaǵdaı jasasa, erteń olar memlekettiń damýyna jaǵdaı jasaıdy. Elimiz aman bolsyn, – deıdi birinshi synyptyń ata-anasy Aıgúl Amangeldiqyzy.
Jalpy, 2024-2025 oqý jylynda 9824 bala birinshi synypqa bardy. Aldaǵy ýaqytta Zaısan qalasynda 300 oryndyq, Jańa Buqtyrma kentinde 200 oryndyq bilim mekemesi ashylady. Al «Jaıly mektep» jobasymen jeti mekteptiń qurylysy júrip jatyr. Atap aıtsaq, О́skemende 1500 oryndyq úsh mektep, Rıdderde 600 oryndyq bir mektep, Shemonaıha aýdanynda 300 oryndyq bir jáne Glýbokoe aýdanynda 600 oryndyq eki mektep ashylady.
Aıtqandaı, Prezıdent tapsyrmasyna oraı Shyǵysta bastaýysh synyp oqýshylary tegin tamaqtanady. Áleýmettik jaǵynan az qamtylǵan otbasylardyń oqýshylary da mektepte tegin tamaqpen qamtamasyz etilgen. Jalpy, aımaqta 4,6 myń balany mektepke kúndelikti tasymaldaýǵa 126 avtobýs qyzmet kórsetedi.
Shyǵys Qazaqstan oblysy
