Joldaýdyń basty baǵyty

Bizge sapa mańyzdy

Úkimet otyrysy Prezıdent Jarlyǵymen taǵaıyndalǵan Týrızm jáne sport mınıstri Erbol Myrzabosynovtyń ant qabyldaýymen bastaldy. Premer-mınıstr jaýapty qyz­mette jańa mınıstrge ta­bys tilep, burynǵy mınıstr Ermek Marjyqpaevqa atqar­ǵan jumysy úshin alǵysyn bildirdi.

Otyrystyń kún tártibin­degi negizgi máseleni qaraý barysynda Úkimet basshysy Prezı­denttiń «Ádiletti Qazaq­stan: zań men tártip, ekono­mıkalyq ósim, qoǵamdyq optı­mızm» atty Joldaýy  árbir joly qazirgi zamannyń shynaıy talaptary men syn-qaterlerine jaýap beretin mańyzdy ári der kezinde jarııalanǵan qujat ekenin atap ótti.

«Prezıdenttiń Joldaýyn sapaly iske asyrý – bizdiń basty mindetimiz. Memleket basshysy atap ótkendeı, bul maqsatqa ekonomıkanyń qurylymyn ózgertý ar­qyly qol jetkize alamyz. Salalardaǵy mundaı ózge­rister qazirdiń ózinde taý-ken sektorynyń úlesin azaıtyp, óńdeý ónerkásibiniń ósý qarqynyn arttyrýǵa múmkindik berdi. Sondaı-aq biz joǵary deńgeıde óńdelgen ónim shyǵarýǵa basymdyq beretin bolamyz. Bul salanyń áleýeti úlken. Memleket basshysy Úkimet pen ákimdikter barynsha kóńil bólýge tıis problemalardy naqty belgilep berdi. Barlyq memlekettik organdar Prezıdent aıtqan tapsyrmalardy jan-jaq­ty pysyqtap, qoıylǵan min­detterdi sheshýdiń naqty joldaryn aıqyndaýy qajet», dedi Oljas Bektenov.

Úkimet basshysy bıýdjet qarajatyn ońtaıly jum­saý­dyń mańyzdylyǵyna toq­taldy. Sondaı-aq respýb­lıka­l­yq bıýdjettiń kiris bóligin qamtamasyz etý baǵytynda jumysty edáýir kúsheıtý qajet ekenin aıtty.

Strategııalyq baǵdar jolynda

Premer-mınıstr Memle­ket basshysynyń Joldaýy Úkimet pen qoǵam úshin strate­gııalyq baǵdar ekenin atap kórsetti.

«Joldaý bizge taıaý mer­zim­ge arnalǵan maqsat-mindet­ter­men qatar nysanaly kórsetkishteri jáne ındıkator­lary belgi­lengen naqty is-qımyl algo­rıtmin aıqyndap berdi. Árbir tarmaqtyń oryndalýy qatań baqylaýda bolady. Bul rette qorytyndy nátıjege, onyń ekonomıkaǵa tıimdiligi­ne basa nazar aýdarylady. Aza­mattardyń tabys deńgeıin arttyrý – Úkimet jumysynyń ózgermeıtin basty maqsaty. Kásipkerlikti damytý, halyq­ty jumyspen qamtý úshin qolaıly jaǵdaılar jasaý jáne memlekettik bıýdjetti utymdy bólý aıtarlyqtaı ekonomıkalyq órleýge qol jetkizýge múmkindik beredi. Bul rette Memleket basshysy atap ótkendeı, «ekonomıka ósken saıyn áleýmettik teńsizdik azaıyp, orta tap kúsheıe túsýi kerek. Memleket basshysy tereń óńdeý klasterlerin qurý jónindegi árbir iri joba bo­ıynsha óz shıkizatymyz ben qural-jabdyqtarymyzdy barynsha paıdalaný mańyzdy ekenin atap aıtty. Osyǵan baılanysty Ulttyq ekonomıka mınıstrligi salalyq memlekettik organdarmen birlesip, otandyq óndirý­shilerdi qoldaý másele­lerin neǵurlym belsendi ilgeriletýdi jáne sabaqtas óndiristerdi qura oty­ryp, klasterlik júıeni damy­týdy eskerip, árbir jobany iske asyrýdyń naqty jos­paryn jańartýy qajet. Avto­mobıl ónerkásibi boıynsha О́ner­kásip mınıstrligine ón­diris­terdi lokalızasııalaý deń­ge­ıin belsendi arttyrýdy tap­sy­ramyn», dedi Úkimet basshysy.

Úkimet basshysy gazben qamtý máselesine de nazar aýdaryp, salaǵa taldaý júr­gizý jáne qandaı energııa obek­tileri gazǵa aýystyrylatynyn aıqyndaý qajet ekenine mán berdi. Jańa gaz óńdeý qýattaryn salý úshin Energetıka mınıstrligine ınvestısııalyq sheshimder qabyldaýdy jedeldetý tapsyryldy. Eldiń energetıkalyq qaýipsizdigin qamtamasyz etý jónindegi mindetterdi oryndaý úshin qarjylyq damý ıns­­tıtýttarymen birlesip 1 qa­ra­shaǵa deıin jańa genera­sııa ny­sandarynyń qury­lysyna uzaqmerzimdi kredıt berý tetikterin ázirleý qajet. Sondaı-aq Energe­tıka mınıstrligi múddeli memle­ket­tik organdarmen birlesip 6 qa­zanda respýblıkalyq referen­dýmdy uıymdastyrý jáne sapaly ótkizý jóninde sharalar qabyldaýǵa tıis.

Ulttyq ekonomıka mı­nıstr­ligine múddeli memleket­tik organdarmen birlesip bıyl­ǵy 1 qarashaǵa deıin Úkimet­ke Energetıkalyq jáne kom­mýnaldyq ınfra­qury­lymdy jańǵyrtý jónin­degi ulttyq jobany bekitý jónindegi qaýly jobasyn engizý júkteldi.

«Memleket basshysy kelesi jyldan bastap naq­ty tutyný normalaryn engizý qajettigin atap ótti. Sondyqtan adamdardy resýrs­tardy utymdy paıdalanýǵa yntalandyrý kerek. Ulttyq ekonomıka mınıstr­ligi jyl sońyna deıin tabı­ǵı monopolııalar salasyn­da rettelip kórsetiletin kom­mýnaldyq qyzmetterdi tuty­ný mólsherine qaraı tuty­ný normalaryn engizsin», dep tap­syrma berdi Oljas Bektenov.

Premer-mınıstr kólik-logıs­tıka sektorynyń máse­lelerine nazar aýdaryp, kólik ınfraqurylymyn qol­daý men damytý úlken ınves­tısııalardy tartýdy talap etetinin eskertti. Osyndaı sharalardyń biri – «Qazaqstan temir joly» UK kórsetetin qyzmetterdiń tarıfterin qaıta qaraý. Soǵan oraı «Samuryq-Qazyna» qory Kólik mınıstrligimen birge júkterdi temirjol kóligimen tasymaldaýdyń jańa tarıf­tik saıasatyn ázirleýi qajet.

Oblysaralyq jáne aýdan­ara­­lyq baǵyttardaǵy joldar­dy ortasha jóndeýdi qam­tý­dy ulǵaıtý úshin Kólik mı­nıstr­li­gine osy jyldyń 1 jel­­toq­sanyna deıin naqty joba­lar­dy, kórsetkishterdi jáne qar­jyl­andyrý kózderin aı­qyndaı otyryp, egjeı-teg­jeı jospar ázirleý tapsyryldy. Qara­jattyń maqsatqa saı jum­salýyn baqylaýdyń bári jáne osy jumystardyń mo­nı­torıngi Biryńǵaı sıfr­lyq platforma arqyly júrgizilýge tıis.

Kólik mınıstrligine О́ner­kásip mınıstrligimen jáne «Báıterek» holdıngimen bir­lesip shaǵyn áýe kemelerin satyp alý tetikterin pysyqtaý jóninde tapsyrma berildi.

Sıfrlandyrý jáne ekologııa mádenıeti

Memleket basshysynyń Joldaýynda bergen tapsyrmalaryn iske asyrý sheńberinde Premer-mınıstr sharýalardy qarjylandyrý júıesin qaıta qaraý jónindegi negizgi mindetterdi belgiledi. Aýyl sharýashylyǵy mınıstrli­gine qarjy-ekonomıkalyq blokpen jáne «Báıterek» holdıngimen birge tikeleı sýbsıdııa berýden tómendetilgen mólsherlemeler boıynsha qoljetimdi nesıe berýge birtindep kóshý tetigin ázirleýdi tapsyrdy. Bul ju­mysqa ekinshi deńgeıdegi bankterdi tartý kerek.

Mal sharýashylyǵy men ósimdik sharýashylyǵyndaǵy derekterdi burmalaý fakti­lerine qatysty salany sıfr­landyrý jónindegi jumysty kúsheıtý jáne derekterdi kez kelgen burmalap berýdiń jolyn kesý qajet. Sondaı-aq Bas prokýratýramen birle­sip, jerdi alyp qoıýdyń ońaı­la­tylǵan tártibin ázirlep, qabyl­daýdy júktedi.

«Memleket basshysy elimiz­diń orman alqaptaryn ulǵaı­týdy, onyń ishinde «Semeı or­many» rezervatynyń tu­qym­dyq materıal ósirýdegi tájirıbesin paıdalanýdy tapsyrdy. Ekologııa mınıstrligi osy jobany ormandy óńirler­diń bárine taratýy kerek. Eko­logııalyq mádenıetti damytý­dyń 2029 jylǵa deıingi tujy­rym­damasy qorshaǵan ortany taza kúıinde saqtaýdyń jáne «Taza Qazaqstan» eko­lo­gııalyq naýqanynyń jal­ǵasyna aınalýǵa tıis. Bul tujyrymdamany osy aı­dyń sońyna deıin qabyl­daý qajet», dep atap ótti Úkimet basshysy.