Foto: ashyq derekkózden
Qazaqstannyń eksporttyq-kredıttik agenttiginiń (EKA) habarlaýynsha, О́zbekstannan bólek Reseıge quny 20 mlrd teńgeden asatyn kelisimshart boıynsha qoldaý kórsetildi. Sondaı-aq Tájikstanǵa – 2,2 mlrd teńgege, Qyrǵyzstanǵa – 2,2 mlrd teńgege, Sıngapýrǵa – 2,2 mlrd teńgege, Polshaǵa – 9,2 mln teńgege, Ázerbaıjanǵa 3,2 mln teńgege taýar satyldy.
Eksporttalǵan ónimderdiń basym bóligi – tamaq ónerkásibi (45,2%), metallýrgııa (36,4%), mashına jasaý (10,3%), agroónerkásiptik keshen ónimderi (5,8%) jáne qurylys materıaldary (1,7%).
«Eksporttyq-kredıttik agenttik otandyq kásiporyndarǵa jan-jaqty qoldaý kórsetip, eksport múmkindigin arttyrýǵa, jańa naryqtardy ıgerýge jáne básekege qabiletti ónim óndirýge kómektesedi. Qazirdiń ózinde jyl basynan beri 236 eksport kelisimsharty jasaldy. Biz usynatyn qoldaý quraldary bıznestiń túrli qajettiligine beıimdelgen, sondaı-aq eksporttyq sıkldyń kez kelgen kezeńinde utymdy sheshim qabyldaýǵa múmkindik beredi», deıdi Saqtandyrý jáne kepildik berý departamentiniń dırektory Dáýren Nuranov.
Osy oraıda júzege asqan keısterdi atap ótken de oryndy. Mysaly, joǵary sapaly shyny ydys óndirýmen aınalysatyn shymkenttik «EýroKrıstal» JShS qysqamerzimdi debıtorlyq bereshekti saqtandyrý jáne eksport aldyndaǵy qarjylandyrý deıtin agenttiktiń eki birdeı qoldaý quralyn paıdalandy. Nátıjesinde, kompanııa О́zbekstan naryǵyna shyǵyp, sheteldik satyp alýshylar qataryn arttyrdy. Búginde kásiporynnyń eksporttyq úlesi 10 paıyzdan asady.
Sonymen qatar agenttik kómegimen elimizdegi alǵashqy jáne jalǵyz robottandyrylǵan «Troya» jıhaz zaýyty Reseıge taýar tasymaldaıtyn boldy. Kompanııa EKA usynǵan eksporttyq nesıeni saqtandyrý quralyn qoldanǵan. Búginde EO elderi de bizde óndiriletin mektep pen zerthana jıhazdaryna qyzyǵýshylyq tanytyp otyr.
