Tuńǵysh ret týǵan elinde

Aqtaý qalasynda saılaýdyń saǵaty soǵyp, halyq biri kelip, biri ketip jatqan shaqta ulttyq naqyshtaǵy  beshpet kıgen jyly júzdi apaǵa kózim tústi. Janyna jaqyn baryp, sózge tartýdyń sáti tústi. Aq jaýlyqty ana – ótken jyly ǵana shet memleketten oralǵan qandasymyz, birneshe perzent tárbıelep-ósirgen Aqbala QIIаQBAEVA eken. – Apa, daýys berýge erteletip kelipsiz ǵoı... – Iá, «erte turǵan jigittiń yrysy, erte turǵan áıeldiń bir isi artyq» demekshi, árdaıym erte turyp, sharýamdy sharýalaǵan­dy durys kóremin. Al búgingi­deı elimizdiń Prezıdentin saılaý sátinde kún uzaq qoı dep arqany keńge salyp jatyp almaı, erteletip kelgen betim edi. Sóıtsem, ózim daýys beretin 28-shi saılaý ýchaskesine eń birinshi kelippin. Ánuran shyrqalyp, saılaýdyń saltanatty ashylýyna kýá boldym. – Jasyńyz neshede? О́zińiz týraly aıtyp ótseńiz? – Jasym 75-ke taıap qaldy. О́mirge segiz bala ákelip, olar­dyń barlyǵyn da aıaǵynan tur­ǵyzdyq. Qudaıǵa shúkir, qazir árqaısysy bir úı, nemereler ósip keledi. Buǵan deıin otbasymyz Qa­raqalpaqstanda turyp kelgen bolatyn. Erjetken balalardyń aldy birinen soń biri Qazaqstanǵa qonys aýdaryp, ata jurtta shańyraq kótere berdi. Eń sońynda ótken jyly ózimiz de keldik. Qazaqstannyń azamaty, Aqtaý qalasynyń turǵyny retinde bıyl atamekenimiz – Qazaqstannyń saılaýyna alǵash ret qatysyp, daýys berý qýanyshyna ıe bolyp turmyn. – Demek, óz tańdaýyńyzdy jasadyńyz ǵoı? – «Syrt kóz – synshy» deıdi ǵoı atam qazaq, ishi-baýyrymyz týǵan elim dep eljirep, Qazaqstan týraly syrttaı oqyp-bilip, estip júremiz ǵoı. Tynyshtyq, halyq baqýatty, balalar ósip keledi. Záýlim úıler boı kóterip, joldar salynýda. Bárine shúkir deýimiz kerek jáne búgingi tirligimizge qanaǵatpen, barǵa da, joqqa da sabyrmen qaraǵanymyz jón. Qazaqstannyń bolashaǵy budan da jaqsy bolatynyna senemin. Bizden buryn Qazaqstanǵa ketken balalarymnyń bári de úıli-kúıli, jaǵdaıly. Búgingi kúnimiz­ge rızamyz. Tynyshtyq úshin, bala­larymnyń amandyǵy men berekesi úshin óz tańdaýymdy jasadym. Gúlaıym ShYNTEMIRQYZY, «Egemen Qazaqstan». Mańǵystaý oblysy. Sýretti túsirgen Serik MAIEMEROV.