Kollajdy jasaǵan – Záýresh Smaǵul, «EQ»
Jańa ınvestısııalyq jobanyń irgetasy qalanǵan ıigilikti sharaǵa Aqmola oblysynyń ákimi Marat Ahmetjanov, Kólik vıse-mınıstri Maqsat Qalıaqparov, «Qazaqstan temir joly» AQ tóraǵasynyń orynbasary Talǵat Aldabergenov qatysty.
Elimiz úshin mashına jasaý – ındýstrııalandyrýdyń negizgi dińgegi. О́ıtkeni ekonomıkanyń ózge baǵyttary dál osy salaǵa táýeldi. Mashına jasaý agroónerkásip, energetıka, metallýrgııa, kólik sekildi irgeli sektorlardyń jumysyn jandandyryp otyr. Temirjol – osy salanyń úlken bir bóligi.
Aımaq basshysy Marat Ahmetjanovtyń aıtýyna qaraǵanda, jańa joba tek osy salany ǵana emes, búkil óńirdi damytatyn úlken qozǵaýshy kúsh bolmaq.
«Men úshin búgin oblys aýmaǵynda lokomotıvterdi qurastyrý boıynsha tarıhy mol temirjol toraby sanalatyn Atbasar qalasynda zamanaýı zaýyttyń qurylysyn bastaý – úlken mártebe. Memleket basshysynyń eldiń berik ónerkásiptik qańqasyn qalyptastyrý, ekonomıkalyq ózin-ózi qamtamasyz etý jónindegi alǵa qoıǵan mindeti sheńberinde «Qamqor Lokomotıv» jobasy óz jumysyn istep tur. Bul – óńirdegi iri jobalardyń biri. Jobany júzege asyrý óńirdiń áleýmettik-ekonomıkalyq damýyna, sondaı-aq halyqtyń jumyspen qamtylýy men tabysyna oń áser etedi», dedi oblys ákimi.
Atbasar lokomotıv qurastyrý zaýyty alda magıstraldyq elektrovozdardyń 100 seksııasyn, magıstraldyq elektrovozdardyń 200 seksııasyn, manevrlik teplovozdardyń 60 seksııasyn shyǵarmaq.
«Birinshi kezeń shamamen 3-4 jylǵa sozylady. Bastapqy kezeńde 80 adam jumys isteıdi. Olar, negizinen jobalaýshylar. Birte-birte kadrlyq áleýet 800 adamǵa deıin jetkiziledi. Bolashaqta lokomotıv elementterin oqshaýlaý, daıyndaý josparlanyp otyr. Zaýyttyń alańy jumys istep turǵan vagon jóndeý zaýytynyń janynda arnaıy tańdalǵan», dedi jańa zaýyttyń dırektory Janatbek Adambaev.
Sýretterdi túsirgen – Erlan OMAR, «EQ»
Zaýyttyń qurylysy kelesi jyly bastalyp, 2026 jyly aıaqtalmaq. Alǵashqy lokomotıv 2027 jyly shyǵarylmaq. Jeke ınvestısııalyq jobanyń quny – shamamen 47 mlrd teńge. Bul jobalardyń barlyǵy aýdan, oblys ekonomıkasyn damytýǵa úlken septigin tıgizip, jańa jumys oryndary paıda bolmaq.
«Kásiporyn Atbasar elektrovoz jóndeý zaýyty janynan salynady. Onda bilikti mamandar bar. Qalanyń da áleýeti úlken. Otandyq ónimderdi de qoldanamyz. Lokomotıvke shamamen 20 shaqyrym sym qajet. Zaýyttyń jumysy – lokomotıvti daıyndaý, iri bólshekterdi jınaý, boıaý, synaqtan ótkizý, tapsyrys berýshige jetkizý», deıdi zaýyt dırektory.
Osy oraıda aýdandy alǵa jetelep otyrǵan kásiporyndardy da aıtpaı ketýge bolmas. Atbasar elektrovoz jóndeý zaýyty, «Ajdar jáne K» vagon jóndeý kásiporny, «Atbasartehnopark» servıstik seriktestiginiń orny bólek. «Ajdar ı K» JShS-na qarasty kásiporyn júk vagondarynyń barlyq túrin sapaly jóndep qana qoımaı, qajetti bólshekterdi de shyǵara alady. Buǵan qosa aýdan turǵyndaryn syǵymdalǵan ottegi toltyrylǵan ballondarmen de qamtamasyz etip otyr. Jańa tehnologııaǵa ıek artqan zaýyt jumys ónimdiligin jyl saıyn arttyryp keledi. Kásiporyn qyzmetkerleriniń aıtýynsha, ýaqyt talabyna saı bolý úshin salaǵa serpin beretin tyń jańalyqtardan tys qalmaý kerek. Ol úshin aldaǵy ýaqytta munda vagondardy jóndeýdiń tolyq aınalymyn júzege asyrý josparlanyp otyr.
Qazir depoda ár aýysym saıyn 7 júk vagonyna josparly jóndeý júrgizse, 4-5 vagon kúrdeli jóndeýden ótkiziledi eken. 220 adam eńbek etedi. Bıyl maýsym aıynda ortasha eńbekaqy kólemi 390 myń teńgege jetipti. Atbasar tárizdi shaǵyn qala úshin táp-táýir kórsetkish ekeni anyq. Al jańadan salynatyn lokomotıv qurastyrý zaýyty dál osylaı el ıgiligine jarap, óńirdegi jumyssyzdyq máselesin jeńildete túseri sózsiz.
