Sýretti túsirgen Erlan OMAR, «EQ»
О́ńirdegi Abaı, Borodýlıha, Jarma, Kókpekti, Úrjar jáne jańadan qurylǵan Jańasemeı, Maqanshy aýdandarynyń turǵyndary jaıylym jetispeýshiligin jyr qylyp aıtyp otyr. Aımaqtaǵy jaıylymdardyń jalpy kólemi 2,4 mln gektardy qurasa, keıingi júrgizilgen mal sanaǵynyń nátıjesine sáıkes jaıylymdyq jer jetispeýshiligi 287,9 myń gektarǵa jetken.
«Qazir jaıylymdyq jer tapshylyǵyn joıý úshin shalǵaıdaǵy mal sharýashylyǵy úshin bos jerlerden jer ýchaskelerin berý jumystary atqarylyp jatyr. О́ńir turǵyndarynyń ótinishin oryndaý boıynsha qaıtarylǵan nemese paıdalanylmaıtyn jerlerdi aınalymǵa tartý isi baqylaýǵa alyndy. Jetispeýshilik týǵyzyp otyrǵan jerler aýyl sharýashylyǵy ónimderin óndirý úshin eldi mekenderge jaqyn jer ýchaskeleriniń berilýine baılanysty. Iаǵnı qoldanystaǵy zańnamaǵa sáıkes eldi mekenge jaqyn ornalasqan jer ýchaskesi jergilikti turǵyndardyń malyn jaıý úshin paıdalanylýy kerek. Biraq mundaı aýmaqtardyń aýyl sharýashylyǵy maqsaty úshin paıdaǵa asatyn tustary bar. Sol sebepti, mal sharýashylyǵyna arnalǵan jaıylym aýmaǵy qysqaryp jatyr», deıdi oblystyq Sáýlet, qala qurylysy jáne jer qatynastary basqarmasynyń basshysy Anzor Abaev.
Vedomstvo basshysy Memleket basshysynyń tapsyrmasyna oraı paıdalanylmaıtyn aýyl sharýashylyǵy jerlerin el ıgiligine qaıtarý jumystaryn júrgizilip jatqanyn alǵa tartty.
Jyl basynan beri paıdalanylmaı jatqan aýyl sharýashylyǵy jerlerin qaıtarý týraly jer komıssııasynyń tórt otyrysy ótkizilgen. Nátıjesinde, 111,3 myń gektar jer memleket menshigine ótti. О́tken jyly paıdalanylmaı jatqan 255,5 myń gektar jer aýyl sharýashylyǵyn damytý maqsatynda memleket menshigine qaıtarylǵan kórinedi.
Abaı oblysy
