UBT-nyń oń ózgeristeri

Keshe Prezıdent janyndaǵy Ortalyq kommýnıkasııalar qyzmetinde aǵymdaǵy jyldyń UBT qorytyndysyna arnalǵan baspasóz máslıhaty ótti. Onda Bilim jáne ǵylym mınıstrligi, bilim jáne ǵylym salasyndaǵy baqylaý komıtetiniń tóraǵasy Saıat Núsipov ulttyq testileýdiń sońǵy aqparattarymen bólisti. Ústimizdegi jyly mektepti 124 346 oqýshy bitirdi, onyń 84 248-i qazaq tilinde oqıtyn oqýshylar bolsa, 40 098-i orys tilinde oqıtyndar. Osy jylǵy UBT-nyń ortasha baly 2,6% ósti jáne 79,5 baldy qurady, deı kele S.Núsipov UBT engizilgeli beri alǵash ret qazaq tilinde oqıtyndar men orys tilindegi bitirýshilerdiń nátıjeleri teńeskendigin atap ótti. Sonymen qatar, 4397 úmitkerdiń 2205-i «Altyn belgi» alyp, jeńis máresinen kóringen. Bıylǵy jyly testileýdiń eń joǵary upaıy 125-ti ıelengen bitirýshiler sany 5 bolsa, 100-den joǵary jınaǵandar sany 14 420 bolypty. Myńnan ozǵan túlekterdi atap óter bolsaq, olar Gúlnaz Erdosova, Rıana Mýstafına, Symbat Samat, Laýra Abdazımova, Anastasııa Iаkovleva, dedi komıtet tóraǵasy. Al joǵary oqý ornyna túsý úshin 50 baldyq shekti deń­geı­den ótken túlekter sany aldyńǵy jylmen salystyrǵanda 5 paı­yzǵa artqandyǵyn aıtqan S.Núsi­pov respýblıkalyq apel­lıa­sııa­lyq komıssııaǵa túlek­ter­den 347 aryzdyń 131-i qanaǵ­at­tandyrylǵandyǵyn kóldeneń tartty. Bul oraıda, ol osy jyldaǵy UBT qorytyndysynyń ótken jyl­men salystyrǵanda alǵa jyljy­ǵandyǵy, ol júıeni jetildirý jumystarynyń arqasynda bolǵanyn atap kórsetti. Birqatar sebepterge baılanysty ózgertilgen UBT júıesi, aıtar bolsaq – attestat baǵasyn baǵamdaý, shalǵaı aımaqtarda qosymsha beketterdiń ashylýy, aımaqtardyń testke daıyndyǵyn baǵalaýdyń jańa ádisterin qoldaný sekildi ózgerister bıylǵy testileýdiń oń nátıjesine qol jetkizýge sep boldy, dedi ol. Sonymen qatar, UBT tapsyratyn túlekterge arnap 535 myń daıyndyq test suraqtary jáne 172 560 ádistemelik quraldar shyǵarylyp, testileý ótkizilipti. Besinshi pán retinde az tańdalatyn dúnıejúzi tarıhy 27% , hımııa páni 21%, aǵylshyn tili 20%, qa­zaq jáne orys ádebıetteri 7-8% jańartyldy, dedi óz sózinde S.Núsipov. Onyń aıtýy boıynsha ústi­miz­degi jyldyń testileý barysyn jiti baqylap, túlekter úshin psıho­logııalyq jaǵdaı jasaýǵa atalǵan mınıstrlik tarapynan 2 myń azamat bas-aıaǵy 165 bekette qyzmet atqarǵan. Al múmkindigi shekteýli balalar úshin arnaıy kabınetter jasaqtalyp, olardy medısına qyzmetkerleri qadaǵalaǵan. Aıta keterligi, test nátıjesin jarııalaý úshin arnaıy aqparattyq tehnologııalar qoldanylǵan eken. Bul ádis bitirýshilerdiń psıhologııalyq ahýalyn jeńildetýge septigin tıgizgen. Elmıra MÁTIBAEVA, «Egemen Qazaqstan».