Memleket basshysy Qasym-Jomart Toqaev el abyroıyn asyrǵan sańlaqtar Davıd Degtıarev pen Aqmaral Naýatbekti jarqyn jeńisimen quttyqtady. Atbasarlyq paýerlıfter Parıj kúlli álemdi tolaǵaı kúshimen tańdandyryp, 188 kg tartatyn ziltemirdi erkin kóterdi. Kúmis medal tıgen kýbalyq Pablo Ramıres te, qola júldeni qanaǵat tutqan qytaılyq sportshy Iаn Szınlannyń da qaıraty jerlesimizden aspady. 54 kg salmaqta synǵa túsken Davıd tórtjyldyq dodasynyń chempıony atanýdan basty úmittilerdiń biri boldy. Oǵan negiz de joq emes.
2021 jyly Japonııanyń Tokıo qalasynda ótken jazǵy Paralımpıada oıyndaryna alǵash ret qatysqan sańlaq top jaryp, el mereıin asyrdy. Tokıo jazǵy Olımpıadasynda sportshylarymyz 8 qolany mise tutyp, Ánuranymyz shyrqalmaǵanda 25 jastaǵy Davıd Degtıarev Paralımpııa oıyndarynda mereıimizdi tasytqan edi.
Qalyń jankúıer Davıdti 2021 jyldan beri tanıdy. Sebebi 2016 jyly kolledj stýdenti alǵash paýerlıftıng sportynyń qyr-syryn meńgerdi. Alǵashqy synaq jattyǵýynan-aq qyzyǵýshylyǵy oıanǵan sańlaqtyń eki dúrkin Paralımpıada chempıony atanatynyna shúbásiz sengender az. Tek onyń keleshekke degen úmiti ǵana osy bıikke jeteledi. Oblystyq spartakıadadan bastalǵan dańǵyl jol Paralımpıada altynyna bastady. Qazaqstan chempıonatynda jeńiske jetip, álem kýboginde baǵyn synady. Tokıo jazǵy Paralımpıada synyna deıin Azııa chempıonatynda qola medal buıyrdy. 2018 jyly Indonezııada ótken jazǵy Paraazıada dodasynda eńsergen úzdik kórsetkishimen kúmis medal oljalady. 2021 jyldyń kókteminde Grýzııada ótken álem chempıonatynda 158 kg ziltemirdi erkin kóterip, álemdik rekord ornatty. Úsh jyl buryn Japonııa astanasyndaǵy Paralımpıada saıysynda Davıd Degtıarev 54 kg salmaqta 174 kg ziltemirdi kótergende, kúmis júldeni mise tutqan fransýz Aksel Býrlon men qola medal ıegeri atanǵan grekııalyq Dımıtrýs Bakohrıstos jerlesimizdiń jetistigine mańaılaı almady (165 kg). Kásibı sportpen shuǵyldanyp júrgenine bes jyl tola qoımaǵan tolaǵaıdyń tolaıym tabysy osylaısha esimin álemge áıgiledi.
Byltyr Qytaıdyń Hanchjoý qalasynda ótken jazǵy Paraazıada oıyndarynan Davıd Degtıarev altyn medalmen oraldy. 54 kg salmaqta synǵa túsken ol 187 kg ziltemirdi kóterip, Azııa rekordyn jańartqan edi.
«Maǵan qoldaý kórsetken Qazaqstan halqyna, barsha jankúıerge alǵysymdy aıtamyn. «Mergen» sport klýbynyń basshylyǵyna, jeke bapkerim Iýrıı Kolesnıkovqa osyndaı jetistikke jetý jolynda qoldap, orasan kómek kórsetkeni úshin razylyǵymdy jetkizemin», dedi sportshy.
Paralımpıada dodasynda paradzıýdodan J2 sanatynda synǵa túsip, 48 kg salmaqta dúnıejúziniń tegeýrindi balýandaryn aıqyn utqan Aqmaral Naýatbektiń esimi de el sportynyń tarıhyna altyn árippen ádipteledi. О́ıtkeni osy sporttan áıelder arasynda tuńǵysh álem chempıony atandy, jazǵy Para Azııa oıyndarynda top jardy. Endi, mine, Parıj tórinde qalaqtaı qyz qazaq eliniń abyroıyn asqaqtatty. Shırek fınalda úndistandyq balýandy aıqyn jeńip, jartylaı fınalda túriktiń tegeýrindi balýanyn alyp urdy. Al fınalda 70 mıllıon jankúıeriniń aldynda fransýz sportshysyn san soqtyrdy.
Nurdáýlet Jumaǵalı Parıj Paralımpıadasynyń fınaldyq synyna ótip, SB13 sanatynda 100 metrge brass ádisimen júzýden kúmis medal ıelendi. Úsh jyl buryn Tokıo jazǵy Paralımpııa oıyndarynda qola medal enshilegen sańlaq bul joly da mereıimizdi tasytty.
Qorjynymyzǵa qola medal salǵan sportshy Dastan Muqashbekov ıadro laqtyrýdan F36 sanatynda baq synap, Azııa qurlyǵynyń rekordyn jańartty. Kórsetkish – 16 metr. Parajúzýden Rıo Paralımpıadasynyń chempıony Zúlfııa Ǵabıdýlına 50 metrge brass ádisimen júzýde 10-satyǵa ornyqty.
Kezekti jarys kúniniń nátıjesinde Qazaqstan sportshylary 2 altyn, 2 kúmis, 1 qola medalmen 33-satyǵa ornyqty.
