Sýret: elements.envato.com
Elimizdiń medısına salasynyń jetistikteri joq emes, alaıda kemshilikter de baryn aıtty. Naýqastarǵa memlekettik kepildik bergen qyzmetterdi aqyly negizde alýy nemese birneshe aı boıy kezek kútýdi usyný syndy jónsizdikterge jol bermeýdi tapsyrǵan Qasym-Jomart Toqaev bıýdjettiń múmkindigi men mindettemesin eskere otyryp, medısınalyq kómektiń biryńǵaı bazalyq toptamasyn jasaý qajettigin atady. Árıne, mundaı mańyzdy ózgeristerdi sıfrlandyrýsyz sátti júzege asyrý múmkin emes.
Shynynda da, qazirgi ýaqytta jumys istep turǵan birneshe ondaǵan ártúrli baǵdarlama men derek bazasynyń ornyna biryńǵaı memlekettik medısınalyq aqparattyq júıeni quratyn ýaqyt keldi. Ol memlekettik tapsyrystardy alatyn barlyq densaýlyq saqtaý uıymy úshin, olardyń menshik nysanyna qaramastan, derekterdiń túpkilikti baqylaýyn jáne obektıvtiligin qamtamasyz etýge tıis. Prezıdent Úkimetke bul ózekti máseleni jedel sheshýdi jáne jumys barysyn baıandaýdy tapsyrdy.
Otandyq densaýlyq saqtaýdy damytý úshin memlekettik-jekemenshik áriptestik tetigi arqyly resýrstardy belsendi tartý qajet.
«О́kinishtisi, shetelderdiń memleket-jekemenshik áriptestikke qatysty ozyq tájirıbeleri áli de zańnamamyzda tolyq kórinis tapqan joq. Munyń bári jobalardyń tıimsiz bolýyna, bıýdjetke túsetin salmaqtyń tym artýyna ákelip soqtyrady», degen Memleket basshysy tásilderdi qaıta qaraý kerektigin, ınvestısııa tartý úshin tıimdi tarıfter usyný, Úkimet densaýlyq saqtaý jáne bilim berý salalaryna memleket-jekemenshik áriptestiktiń jeke standarttary men erejelerin ázirleý kerektigin mindettedi.
Elimizde bilikti medısına mamandarynyń tapshylyǵy da tasada qalmady. Bul máseleni sheshý úshin, eń aldymen, medısına salasyndaǵy bilim sapasyn barynsha arttyrǵan jón. Sonyń ishinde grant qunyn rettep, tıimdi taratý qajettigine nazar aýdardy.
Qoǵamnyń salamattylyǵyna qatysty mańyzdy máselelerdi otandyq medısına salasy jaýapkershilikpen sheshedi dep senemin.
Aıman RAQYShEVA,
Qonaev qalalyq kópsalaly aýrýhanasynyń dırektory
Almaty oblysy
