Osyǵan baılanysty oblystyq onkologııa dıspanserinde ókpeniń qaterli isigin erte dıagnostıkalaý ashyq esik kúni ótti. Dıspanserdiń dárigeri Gaýhar Qarıshovanyń deregine súıensek, bul aýrýǵa 40 jastan asqan turǵyndar shaldyǵady.
«Ashyq esik kúnderin ótkizýdiń maqsaty – turǵyndardy qaterli isikterdiń qaýpi men damý faktorlary, erte dıagnostıkalaý múmkindikteri, ásirese ókpe obyryn erte anyqtaýdyń mańyzy týraly habardar etý. Statıstıkaǵa sáıkes byltyr Atyraý oblysynda 59 adamnan ókpeniń qaterli isigi anyqtalǵan edi. Al bıyl jeti aıda bul aýrýǵa shaldyqqan naýqastar sany 72 adamǵa jetti», deıdi G.Qarıshova.
Onyń aıtýynsha, ókpe obyrynyń birneshe belgisi bar. Alǵashqyda uzaq merzimge sozylatyn jótelmen bastalady.
«Jótel aldymen qurǵaq kúıinde bolady. Sodan keıin birtindep qaqyryq túsedi. Keıde qan aralasqan qaqyryq bolýy múmkin. Osyndaı belgi baıqalǵan adam der kezinde em qabyldamasa, qaqyryq irińge aınalady. Naýqastyń dene temperatýrasy kóterilip, oǵan álsizdik pen entigý qosylady. Keıin qaterli isik pnevmonııasyna ulasady. Al asqyný údegen saıyn daýys qarlyǵyp, júregi nemese qolynda aýyrsyný baıqalady. Beti kógerip, isinedi. Moınynda, qoly men keýde qýysynyń tamyrlarynda isik paıda bolady», dedi G.Qarıshova.
О́ńirdegi áıelder arasynda jatyr moıny obyryna shaldyqqandar da bar. Oblystyq onkologııa dıspanseriniń onko-gınekologi Jadyra Qudabaevanyń aıtýynsha, qazir osyndaı syrqatpen 560 áıel esepte tur. Byltyr atalǵan aýrý saldarynan 24 áıel qaıtys bolǵan. Bıyl 6 aıda jatyr moıny syrqatyna 56 áıel shaldyqqan.
«Jatyr moıny obyrynan saqtanýdyń negizgi joly – adam papılloma vırýsyna qarsy ekpe alý. Dúnıejúzilik ǵalymdardyń zertteýine súıensek, qaterli isikti týdyrýshy vırýs adam pappılomasy ekeni dáleldengen. Osyǵan baılanysty Atyraý oblysynda 2012–2013 jyldary bul ekpe qanatqaqty joba retinde iske asyryldy. Sol kezde ekpe alǵandardan atalǵan aýrýdyń belgileri anyqtalmady. Sondyqtan bıyl vaksınany qaıta egý josparǵa engizildi. Ekpe salý oqýshy qyzdarǵa ata-anasynyń ruqsatymen ǵana júrgiziledi», dep habarlady J.Qudabaeva.
Atyraý oblysy
