Foto: Aqtóbe oblysy ákimdigi
Atalǵan oblys ákimdiginiń málimetinshe, sý tasqynynan keıin baspanasyz qalǵan yrǵyzdyqtarǵa úılerdiń kiltterin saltanatty tabystaý rásimine oblys ákiminiń orynbasary Asylbek Esenbaev, aýdan ákimi Nurlan Qyzbergenov, ERG jáne «Qamqor Aqtóbe 2024» qorynyń ókilderi qatysyp, úı ıelerin quttyqtady.
«Birinshi jáne qaıtalama naryqtaǵy páterlerdi satyp aldyq. 500 turǵyn úı salyp jatyrmyz. Bul rette tabıǵı apattan zardap shekkenderdi baspanamen qamtýǵa demeýshilik jasap jatqan elimizdegi iri kompanııalarǵa, kásipkerlerge alǵysymyzdy bildiremiz. Búgin, mine, Yrǵyz aýylynan 51 úıdi sizderdiń ıgilikterińizge berip jatyrmyz», dedi oblys ákiminiń orynbasary.
Aıta ketsek, Aqtóbe óńirinde búginge deıin 513 otbasyǵa úı berilgen. 4 myńnan astam otbasyǵa 1,6 mıllıard teńge somasynda birrettik áleýmettik kómek kórsetilse, 3 495 otbasynyń múliktik shyǵyndary ótelgen.
