Foto: Depositphotos
Oljas Bektenov Munaıly aýdany Besshoqy aýylyndaǵy balalardyń ýlanýyna qatysty Densaýlyq saqtaý, Oqý-aǵartý mınıstrleri men Mańǵystaý oblysynyń ákimin tyńdady.
«Búgingi tańda 460 bala dárigerlerdiń baqylaýynda, olardyń 83-i aýrýhanada, taǵy eki bala jansaqtaý bóliminde jatyr. Barlyq zardap shekkenderdiń jaǵdaıy turaqty. Densaýlyq jaǵdaıynyń jaqsarýyna baılanysty reanımasııada bolǵan eki bala jalpy bólimshege aýystyrylady», delingen habarlamada.
Ýlaný belgilerimen kelgen balalardyń barlyǵyna tolyq kólemde qajetti medısınalyq kómek, onyń ishinde psıhologııalyq kómek kórsetiletini atap ótildi. Oqıǵa ornynda Oqý-aǵartý mınıstrligine qarasty Balalardyń quqyqtaryn qorǵaý komıtetiniń ókilderi jumys istep jatyr. Zardap shekkenderge jáne olardyń otbasylaryna qoldaý sharalaryn kórsetý boıynsha jumystar júrgizilip jatyr. Aýrý oshaǵyn oqshaýlaý jáne joıý sharalaryn kúsheıtý úshin oblysqa «Halyq densaýlyǵyn qorǵaý ulttyq ortalyǵy» RMK janyndaǵy «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» RMK fılıalynyń mamandary jiberildi.
«Úkimet basshysynyń tapsyrmasy boıynsha bir aı merzimde respýblıkadaǵy barlyq mektep ashanalary sanıtarlyq-epıdemıologııalyq talaptardyń saqtalýyn qadaǵalaıdy, bul shara mekteptegi tamaqtandyrýdyń qaýipsizdigin qamtamasyz etý sharalaryn kúsheıtýge jáne mundaı jaǵdaılardyń qaıtalanýyn boldyrmaýǵa baǵyttalǵan», dep habarlady Úkimettiń baspasóz qyzmeti.
Esterińizge sala keteıik, Besshoqy aýylyndaǵy №8 mektepte birinshi jáne tórtinshi synyp oqýshylary ashanada jappaı ýlanyp qalǵan.
