Atyraýdaǵy «Teńiz» kenishinde jumysshy qaıtys boldy

ATYRAÝ. 26 qańtar. Atyraý oblysyndaǵy «Teńiz» kenishinde merdiger kompanııanyń eki jumysshysy aýyryp, bireýiniń qaıtys bolǵany belgili boldy. Bul týraly egemen.kz tilshisi habarlady. Osy oqys oqıǵa 26 qańtarǵa qaraǵan tańda tirkelgen. «Teńiz» kenishindegi merdiger kompanııanyń biri – «Imstalkom» seriktestiginde qyzmet etetin 1973 jyly týǵan R. esimdi Shyǵys Qazaqstan oblysynyń azamaty juqpaly dertten klınıkada tańǵy saǵat 05:15-te kóz jumǵan. Alaıda, Jylyoı aýdandyq tutynýshylar quqyǵyn qorǵaý basqarmasyna jergilikti ýaqytpen saǵat 09:15 mınýtta «Teńizshevroıl» seriktestiginiń vahtalyq qalashyǵyndaǵy klınıkaǵa eki syrqattyń jetkizilgeni týraly málimet túsipti. Kóz jumǵan azamatpen tikeleı qarym-qatynasta bolǵan T. esimdi 1991 jyly týǵan Shyǵys Qazaqstan oblysynyń týmasyna ortalyq aýrýhananyń juqpaly aýrýlar bólimshesinde em jasalyp, keıin oblys ortalyǵyna jiberildi. Dárigerler ázirge «Menıngıt. Menıngokokksemııa» dıagnozymen aýyrǵan dep boljam jasap otyr. Syrqattyń aýrý belgileri mynadaı: qyzý 37 gradýsqa deıin kóterilgen, álsizdik, denesinde jáne aıaǵynda gemmoragasııalyq bórtpeniń paıda bolýy. Onymen qarym-qatynasta bolǵan 3 adam «Teńizshevroıl» seriktestiginiń klınıkasynda oqshaýlanyp, dárigerlerdiń qatań baqylaýyna alyndy. Olardan ázirge aýrý belgileri anyqtalǵan joq. «Qazir oblystyq deńgeıde quramynda ınfeksıonıst, epıdemıolog-dáriger, vırýsologııa jáne bakterıaologııa zerthanasynyń meńgerýshilerinen jasaqtalǵan arnaıy brıgada qurylyp, Jylyoı aýdanyna issaparǵa jiberildi. Qajetti sharalar atqarylyp, epıdemııaǵa qarsy jumystar jasalýda. Barlyq jaǵdaı jiti baqylaýda», dep málimdedi Atyraý oblysy ákimdiginiń baspasóz qyzmeti. Joldasbek Shópeǵul. Derek: Atyraý oblysy ákimdiginiń baspasóz qyzmeti. Cýret: egemen.kz.