Foto: Erlan Omar «EQ»
Búgin de sport súıer qaýymdy tartysty básekeler kútip tur. Sonyń alǵashqysy kókpardan Qazaqstan ulttyq quramasy saǵat 10.00-de AQSh-tan kelgen kovboılarmen kúsh synasady.
Al ıppodrom mańyndaǵy etnoaýylda saǵat 9.00-de jamby atý sportynyń túrki stılinen jerlesterimiz sheberligin ortaǵa salady.
Etnoaýylda aýdaryspaqtan úsh salmaq dárejesinde jarystar ótse, «Arǵymaq» at-sport kesheninde saǵat 10.00-de dástúrli sadaq atýdan «qalqan» nysanasy boıynsha saıys bastalady. Qazaqstan quramasy sapynan 10 sportshy qatysady. Olar: Dınara Jaqsylyqova, Farıza Sabyrjan, Aıkórkem Batıhan jáne Ajar Tóleýqanova. Erler arasynda: Erbol Tapenov, Baqbergen Sálimov, Qasymhan Qanat, Marat Beksultan, Maqsat Ábdikerimov jáne Jánibek Qulmyrzaev.
Jaqsylyq Úshkempirov atyndaǵy Jekpe-jek saraıynda qazaq kúresinen erler men áıelderdiń árqaısy 4 salmaq dárejesinde bozkilemge shyǵady.
El namysyn erler arasynda Ersin Seıitqazynov (82 keli), Erasyl Janataev (90 keli), Ersultan Muzapparov (100 keli), Nurdáýlet Jarylǵapov (+100 keli), áıelder arasynda Zarına Sarıpova (65 keli), Roza Nysantaıqyzy (70 keli), Zámzágúl Faızollanova (77 keli), Albına Bahıeva (+77 keli) qorǵaıdy.
«Alaý» muz saraıynda kýrash ótedi. Bul básekede Ernur Súleımen (60 keli), Aıbek Qazaqbaev (66 keli), Nurdin Shaımerden (73 keli) jáne Altynaı Nurhanova (57 keli) júldege talasady.
Saha halqynyń ulttyq sporty mas-restlıngten jarysqa Berdiqul Áltaı (90 kelige deıin), Erkebulan Erlan (105 kelige deıin) jáne Olga Dýshaeva (75 kelige deıin) qatysady.
«Alaý» muz saraıynda erler arasynda bes tabannan jáne áıelder arasynda bes asyqtan jartylaı fınaldyq báseke ótedi. Asyq atýdan el namysyn 8 sportshy qorǵaıdy. Olar – Nýrkıssa Moljıgıtov, Jomart Nurlanov, Kerim Jazdyqbaı, Amandos Aıtkulov, Perızat Elemes, Kamıla Danııarova, Sanııa Ásker jáne Kógershin Dýman. Fınaldyq oıyndar 11 qyrkúıekte ótedi.
«Dýman» qonaq úıi jáne sport kesheninde saǵat 10.00-de toǵyzqumalaqtan jartylaı fınaldyq oıyndar bastalady. Qazaqstan sapynda Beksultan Bostandyqov, Áýelbaı Ersultan, Móldir Serikqyzy men Ańsaǵan Qojanasip synǵa túsedi.
